Në seancën plenare të së enjtes, Kuvendi nuk arriti numrin e nevojshëm të votave për plotësimin e 4 vakancave në Këshillin e Lartë Gjyqësor dhe Këshillin e Lartë të Prokurorisë. Procesi i përzgjedhjes së tyre u kontestua nga opozita, e cila votoi kundër kandidaturave.
Pas një votimi pa debat, Kuvendi rrëzoi të enjten katër kandidatët e përzgjedhur nga trupat e pedagogëve si anëtarë të Këshillit të Lartë Gjyqësor dhe Këshillit të Lartë të Prokukurorisë.
Katër emrat e përzgjedhur për të plotësuar 4 vakancat në këto dy institucione nuk morën numrin e domosdoshëm të votave, duke e rikthyer procedurat e përzgjedhjes së tyre në nënkomisionin e posaçëm të ligjeve.
Kandidatët për anëtarë të KLGJ-së, Yllka Rupa dhe Orjona Muçollari, morën 87 vota pro, 9 kundër dhe 16 abstenim. Edhe dy kandidatët për KLP-në, Ilir Rusi dhe Mirela Bogdani u rrëzuan pasi morën 87 vota pro, 6 kundër dhe 16 abstenim.
“Çështja rikthehet në nënkomision për të miratuar një listë të re sipas procedurës së parashikuar në ligjin për organet e qeverisjes së sistemit të drejtësisë,” tha kryetarja e Kuvendit, Lindita Nikolla pasi lexoi rezultatin e votimit.
Përzgjedhja e tyre në etapat e parashikuara nga Kushtetuta dhe ligjet përkatëse u kontestua nga opozita, e cila votoi kundër ose abstenoi në seancë, duke e bërë të pamundur miratimin e kandidatëve për këshillat.
Opozita shfaqi rezerva gjatë procesit të përzgjedhjes së tyre në mbledhjen e nënkomisionit të Ligjeve i ngritur për përzgjedhjen e kandidatëve, ku u debatua për raportin e vlerësimit nga Sekretari i Përgjithshëm i Kuvendit. Sekretari i Përgjithshëm, Genci Gjonçaj kishte skualifikuar për mosplotësim të kritereve ligjore shumicën e kandidatëve, duke i dërguar Kuvendit vetëm 4 emra për 4 vende vakante.
Deputeti i Partisë Demokratike, Gazment Bardhi akuzoi se qëllimi i mazhorancës ishte që të shkohej në një proces votimi me “kandidatë të paracaktuar”. PD kërkoi që të kalonin në listën kualifikuese emrat e skualifikuar, por ky propozim nuk gjeti konsensusin e mazhorancës duke e çuar procesin me hedhje shorti, ku në gogla ishin aq kandidatë sa edhe vendet vakante në të dy këshillat.
Pa ndonjë suprizë, shorti nxori kandidatë për KLGJ-në Yllka Rupën dhe Orjona Muçollarin, ndërsa për KLP-në Ilir Rusin dhe Mirela Bogdanin.
Në mbledhjen e posaçme të Konferencës së Pedagogëve të Institucioneve të Arsimit të Lartë u paraqitën në seancë dëgjimore 9 kandidatë, shumica prej të cilëve kandidonte për të dy këshillat.
