Kryetarja e LSI-së Monika Kryemadhi ka postuar një status në rrjetet sociale, duke iu bërë thirrje qytetarëve të Dibrës, që të votojnë në zgjedhjet e 6 marsit për kandidatin e Shtëpisë së Lirisë, Premtim Kryemadhi.
Monika Kryemadhi shprehet se vota për Premtim Kryemadhit do të thotë më shumë investime dhe të mira për Dibrën dhe dibranët.
Postimi i Monika Kryemadhit:
Për të mirën e Dibrës, zgjidhni alternativën më të mirë!
E përshëndes propozimin e z. Premtim Kryemadhi, kandidat i Shtëpisë së Lirisë për bashkinë Dibër, i cili krahas paraqitjes së një platforme për drejtimin e bashkisë, ka ftuar në debat publik kandidatët e tjerë që garojnë në zgjedhjet e 6 Marsit. Ky është një standard demokratik që i ka munguar prej vitesh kulturës së zgjedhjeve në Shqipëri. Ku garat elektorale më së shumti kanë shërbyer si një moment përbaltje, se sa përballje ofertash politike.
Presioni i administratës publike dhe paraja në zgjedhje, janë faktorë që krahas fitores së kandidatit që mbështetet nga këto fenomene, sjell edhe shkatërrimin e qytetit, monopolizimin e ekonomisë, rritjen e taksave që më pas shkojnë në koncesione dhe investime për të pasuruar ata që i hodhën paratë për të blerë vota.
6 Marsi është shans i ri për t’u shkëputur nga të tilla fenomene, që dosjet 184 dhe 339 vërtetuan se kishin ndodhur në Dibër dhe gjerësisht në Shqipëri.
Dibra dhe dibranët meritojnë transparencë!
Zgjidhni më të mirin e Dibrës në 6 Mars!
