Një kallëzim penal ndaj kryetares së Bashkisë Dimal, Juliana Memaj, është regjistruar në 25 Nëntor 2020 në Prokurorinë e Rrethit Gjyqësor Berat. Ajo është akuzuar nga shtetasi Petrit Baho, banues në fshatin Poshnje për: shpërdorim detyre, shkatërrim i pronës private, mashtrim dhe falsifikim. Prokuroria e Rrethit Berat, për shkak të moskompetencës e ka përcjellë kallëzimin penal në SPAK. Ky kallëzim penal, me nr.protokolli 3676 ka kaluar për kompetencë në SPAK në 02.12.2020, raporton “Balkan Web”. Denoncimi është bërë nga 60-vjeçari Petrit Baho, i cili deklaron se i është shkatërruar prona nga fadromat e bashkisë në 23 Nëntor 2020 dhe pas kësaj bashkia i ka dhënë leje një tjetër qytetari të vijojë ndërtimet në këtë pronën e tij. Në kallëzim thuhet se:-“Shtetasi Petrit Baho, i datëlindjes 24.01.1960, lindur dhe banues në fshatin Poshnje, është pronar i pasurisë së paluajtshme me nr.455/12,e llojit “truall dhe godinë 2 KT”, me sipërfaqe 97.6 m2 dhe prona është e regjistruar në zonën kadastrale 3032 në Poshnje. Për këtë pronë, Petrit Baho është i pajisur edhe me certifikatë pronësie. Në 25 Nëntor 2020, me një njoftim të firmosur nga kryebashkiakja Juljana Memaj për lirimin e hapësirave publike, pranë banesës së tij janë paraqitur disa persona si punonjës të bashkisë dhe pa asnjë dokumentacion ligjor, kanë filluar të prishin disa prona aty pranë dhe më pas kanë filluar të prishin edhe objektin me dokumentacion të rregullt të shtetasit Petrit Baho. Pasi është njoftuar policia, e cila nuk ka ndërhyrë, shtetasi Petrit Baho i është drejtuar Gjykatës së Rrethit Gjyqësor Berat për marrjen e masës së sigurimit të padisë. Pak ditë më vonë, mbi pronën e tij ka filluar punimet (që po vijojnë ende) qytetari Ramadan Baho, që pretendon se ka marrë leje nga bashkia”. Petrit dhe Burbuqe Baho i bëjnë apel shtetit të ndërhyjë menjëherë për zgjidhje, pasi siç shprehen ata “bashkia po i vret”. Bashkëshortët Baho pohojnë se, janë kërcënuar nga shumë persona dhe deklarojnë se kryebashkiakja Mema ka marrë 20 mijë paund nga Ramadan Baho, me qëllim favorizimin e tij për ndërtim.”
