Kryeparlamentari Ilir Meta në kuadër të vizitës së tij në Itali, ka shkuar dje në Kalabri, ku do të takohet me përfaqësues të kësaj zone dhe krerë lokalë. Delegacioni parlamentar i kryesuar nga Meta do të zhvillojë vizita në 5 komuna të Unionit të Arbërisë, ndërsa vjen në kuadër të ditëve kulturore të piktorëve figurative. Fillimisht kreu i Parlamentit ka qenë në komunën Santa Sofia depiro, ku është pritur nga autoritetet lokale dhe është takuar me kryetarin e bashkisë. Gjithashtu Meta është pritur në një takim edhe nga prefekti i Kozencës dhe kryetari i parlamentit. Kreu i Parlamentit është shprehur i emocionuar nga kjo vizitë dhe tha se pa arbëreshët sot nuk do të kishte Shqipëri. “Kjo vizitë e parë në tokat arbëreshe është shumë emocionuese për të gjithë ne. Arbëreshët ishin çelësi i ruajtjes së ndërgjegjes kombëtare shqiptare. Pa arbëreshët, sot nuk do të kishte Shqipëri, ndaj sot ndjehemi mirënjohës. Arbëreshët janë ura më e shkëlqyer e lidhjeve të forta shpirtërore mes Shqipërisë dhe Italisë. Shqiptarët e çmojnë me krenari kulturën arbëreshe të ruajtur prej shekujsh. Kontributi juaj për Shqipërinë dhe Italinë nuk ka çmim. Ne duhet të ndërtojmë një program të përbashkët pune për ruajtjen e vlerave gjuhësore dhe kulturore të arbëreshëve”, tha Kreu i Kuvendit.