Ministri i Mbrojtjes, Niko Peleshi, mbeti në ajër gjithë vitin 2023 dhe ka bërë gati planet për udhëtim edhe në vitin 2024. Niko Peleshi ka nisur që në ditët e parë të këtij viti të planifikojë shpenzimet për udhëtime. Jo pak, por 420 milionë lekë do të shpenzojë ministri ynë i mbrojtjes për bileta të transportit ajror, të realizuar përmes tre prokurimeve që do t’i shqyrtojmë më poshtë. Tenderi i parë është publikuar më datë 1 janar 2024 dhe ka si objekt “SISTEM DINAMIK (BILETA TE TRANSPORTIT AJRORE NDERKOMBETAR)”, me vlerë 70 milionë lekë. Sipas të dhënave të tenderit biletat janë kërkuar nga Reparti Ushtarak Nr.1001 Komanda e Forcës Tokësore Tirane që janë në varësi të Ministrisë së Mbrojtjes sipas gijotina. Sikur shohim në dokument tipi i procedurës së prokurimit është Blerje Dinamike e Biletave për Transportin Ajror’. Për ta bërë pak më të thjeshtë, sistemin dinamik i blerjes së biletave përdoret nga institucionet publike me synimin që biletat të sigurohen me çmim më të lirë. Por, kur shohim të dhënat e tenderit, këto bileta nuk janë blerë edhe aq lirë.
100 milionë lekë tre bileta
Gjithsesi, shpenzimet për udhëtime nuk mbarojnë më kaq. Më datën 4 janar është publikuar edhe një tender tjetër me objekt “Udhëtim jashtë shtetit”. Ministria e Mbrojtjes këtë herë ka firmosur që të blihen bileta për Repartin Ushtarak Nr. 4001. Këtu kemi shpenzime më të larta për udhëtime jashtë shtetit. Sipas dokumenteve 3 bileta kanë kushtuar 100 milionë dhe sikur shohim nga tenderi do të bëhet një udhëtim më datë 7 janar 2024 për në Turqi ku do të qëndrojnë një javë, ndërkohë në të njëjtën ditë dy persona të tjerë do të udhëtojnë për në Gjermani, për të cilët udhëtimi do të zgjasë më gjatë, deri më datë 19 janar 2024. Epo reparti ushtarak Nr 4001 paska planifikuar pushime të zgjatura, nuk janë gati të kthehen në detyrë pas festave. Me këto shifra të larta është e pabesueshme të mendohet se do blihen bileta udhëtimi, prandaj po hamendësojmë sigurisht për ndonjë transport të rëndësisë së veçantë. Por dokumenti përcakton qartë që do bëhet transport të disa personave të stafit, sigurisht përfshirë edhe bagazhet, pasi do të qëndrojnë disa ditë jashtë shtetit.
250 milionë lekë bileta për Peleshin
Pasi iu firmosi lejen për udhëtim vartësve të tij, Peleshi ka hapur një tender për të blerë bileta edhe për veten edhe stafin e Ministrisë së Mbrojtjes. Bëhet fjalë për tenderin me objekt “Blerje bilete transporti ajror” të publikuar ditën e sotme. Mbase Peleshi ka planifikuar që të udhëtojë me të gjithë stafin, pse jo dhe familjarët e tij. Sepse ndryshe nuk dimë se si mund të shpjegohet përcaktimi i një fondi prej 250 milionë lekësh për të blerë bileta avioni! Ah, po ka edhe një shpjegim tjetër: Me gjithë këtë shpenzim, mundet që Peleshi do të udhëtojë me helikopter privat rreth globit. Ndërkohë vëmë re se edhe për këto bileta Peleshi do të përdorë sistemin dinamik, por sërish ka vendosur këtë shifër të lartë. Gjithsesi, rezultati do shihet pasi të jenë paraqitur ofertat dhe shpallur fituesi, por është e sigurtë që operatorët asnjëherë nuk zbresin me oferta më poshtë 20% më lirë se fondi limit. Edhe pse është shkelje ligjore, fituesit shpallen zakonisht ata që kanë vlerën më të afërt me fondin limit. Kështu që, i lutemi ministrit Peleshi dhe komandantëve të tij, të mos e harxhojnë gjithë fondin e biletave dhe me kursimet të blejnë një avion si të gjitha ushtritë.
