Dje shumë figura publike të shquara shqiptare, nga arti, shkenca, politika dhe qytetarët mes lotësh dhe lulesh në duar i dhanë lamtumirën e fundit Margarita Xhepës. Ishte një ditë që përloti të gjithë të pranishmit. Pas mbylljes së homazheve që nisën që prej orës 10:00 dhe u mbyllën në orën 13:00 në hollin e Teatrit Kombëtar të Operës dhe Baletit. Ikona e kinematografisë shqiptare u përcoll për në banesën e fundit, varrezat e Sharrës. Ajo u përcoll me lule se lule ishte jeta e saj artistike.
Djali i saj, Ndriçim Xhepa në një prononcim për mediat tregoi ‘pengun’ e saj të fundit, të bënte edhe një film tjetër.
“Kishte një natyrë të çuditshme, madje kur binte biseda në momente të shkëputura, kishte vite që thoshte për skenën nuk kam fuqi, por për filmin kishte dëshirë të bënte edhe një. Mbylli jetën e saj në mënyrë normale pavarësisht se dy muajt e fundit kishte probleme të karakterit shëndetësor, lodhjet e viteve bëjnë të vetën. Filmi “Bolero në vilën e pleqve” përkon edhe me fundin e jetës së saj.“, tha ai.
Margarita ishte mike e gazetës Telegraf. Me të kam zhvilluar mbi 21 intervista madje kam të inçizuara dhe të pabotuara mbi 2 orë, të cilat do të botohen në muajt e ardhshëm. Kam shumë kujtime, sepse së bashku kemi shkuar në çdo skaj të Shqipërisë për aktivitete, por njëkohësisht ajo ka mbresa në çdo skaj pasi s’ka lënë vend të Shqipërisë pa xhiruar, apo pa dalë në skenat e teatrove të qyteteve shqiptare. Bisedat me të ishin një informacion, që kurrsesi s’mund t’i gjesh në literaturat e aktrimit pasi ato janë pasuri e saj vetiake, janë eksperienca e saj e jetës duke xhiruar, apo aktruar direkt në skenë. Pastaj ajo kishte një enciklopedi në mendje pasi takimet e saj me të gjitha shtresat e shoqërisë e kanë bërë që të akumulojë dhe të sistemojë në arkivin e memorjes së saj të rrallë, ngjarje situate, skena, ndodhi, dialog, histori që nuk i gjen në asnjë literaturë. Margarita mbetet e madhe në skenë, e thjeshtë në jetë. Ajo gjithmonë do kujtohet e re, e bukur pasi ishte gjithmonë në lëvizje në aktivitete, në intepretime. Nuk e njihte moshën, sepse e mban të re arti. Një grua zonjë, e dashur, korekte, gojëmjaltë, e gjendur, e bukur, fisnike, mbushur me mirësi. Një artiste që nuk e njohu lodhjen dhe që përhapi dashuri njerëzore kudo që shkeli. Me qindra takime me të kam njohur një artiste të rrallë, me vlera intelektuale të jashtëzakonshme dhe me dëshirën e mirë për të ndihmuar gjithkënd. Ajo më habiste me thjeshtësinë, gadishmërinë dhe fisnikërinë e gruas shqiptare. Ajo kishte lindur për të çuar në çdo familje shqiptare, gëzime, dhe art mbresëlënës. Ka krijuar mbi 150 role në teatër, dhe 40 në filmografi. Në kinematografi, ndër rolet e saj më të njohura janë ato në filmat “Vitet e para”, “Dimri i fundit”, “Koncert në vitin 1936” dhe “Tokë e përgjakur”. Margarita Xhepa mbetet një nga figurat më të shquara të artit shqiptar, duke lënë pas një trashëgimi të çmuar artistike.
