Karabinierët e njësisë operative të Xhenovës sekuestruan, në fund të një operacioni për ndjekjen e një 30-vjeçari shqiptar, 5 kg kokainë dhe 22 kg kanabis.
Mediat italiane shkruajnë se e gjitha filloi kur u vu re 30-vjeçari që drejtonte një automjet që bënte lëvizje të çuditshme, duke parë vazhdimisht përreth.
Mësohet se karabinierët filluan një shërbim të gjatë vëzhgimi dhe ndjekjeje të shqiptarit duke arritur të identifikonin vendbanimin e tij në Vigevano.
Pas orësh pritjeje, ai u ndalua dhe u kontrollua teksa po dilte nga një apartament dhe iu gjet në posedim një pako që përmbante afërsisht 58 gramë kokainë.
Karabinierët gjithashtu kontrolluan apartamentin dhe gjetën të shpërndara në pjesë të ndryshme të shtëpisë, të fshehura midis jastëkëve të divanit dhe gjithashtu nën tavolinën e kuzhinës, pothuajse 5 kilogramë kokainë, nga të cilat tre blloqe ishin ende të paprekura dhe pjesa tjetër tashmë e ndarë në qese me pesha të ndryshme, gati për t’u vendosur në tregun me shumicë.
Ato ishin të vulosura në blloqe me një imazh të Al Pacinos në filmin “Scarface” (Njeriu me shenjë) sipër ose në qese të vulosura me nxehtësi
Gjithashtu në kuzhinë, Karabinierët gjetën 22 kilogramë hashash të ndarë në 122 blloqe, këtë herë të ruajtur në frigorifer. U sekuestruan gjithashtu 7,000 euro në para të gatshme dhe materiale të ndryshme paketimi.
