Komisioneri i Bashkimit Evropian Oliver Varhelyi tha të hënën se blloku po pezullon “të gjitha pagesat menjëherë” për palestinezët për shkak të asaj që ai e quajti “shkalla e terrorit dhe brutalitetit” gjatë sulmeve të Hamasit kundër Izraelit. Njoftimi i befasishëm nga Varhelyi erdhi vetëm disa orë pasi zyrtarët e BE theksuan se e konsiderojnë Hamasin një grup terrorist. Pyetjet se çfarë përfshinte masa dhe nëse do të godiste gjithë ndihmën humanitare për palestinezët nuk u përgjigjën menjëherë. Varhelyi tha se “si donatori më i madh i palestinezëve, Komisioni Evropian po e vë në shqyrtim portofolin e tij të plotë të zhvillimit”, i cili tha ai arrin në 691 milionë euro. Nuk ishte menjëherë e qartë se cilat fonde ishin përfshirë dhe përjashtuar. Ai shtoi se masat përfshijnë që “të gjitha pagesat të pezullohen menjëherë. Të gjitha projektet e vëna në shqyrtim dhe të gjitha propozimet e reja të buxhetit shtyhen deri në një njoftim të dytë.” Ministrat e jashtëm të BE-së kanë planifikuar të takohen në Muscat, Oman të martën për të diskutuar situatën dhe për të parë se çfarë veprimesh duhet të ndërmerren. Njoftimi i Varhelyi dukej se i parapriu diskutimet. Gjatë një konference të mëparshme të hënën, Komisioni i BE-së kërkoi të vinte një vijë të qartë midis Hamasit, të cilin e konsideron një organizatë terroriste, dhe popullit palestinez, i cili ka nevojë për ndihmë humanitare.
