Një raketë SpaceX e cila mbante tre astronautë amerikanë dhe një kozmonaut rus është nisur nga Florida me destinacion Stacionin Ndërkombëtar të Hapësirës (ISS).
Ata kanë një mision gjashtë-mujor dhe hapësira është një nga zonat e pakta ku SHBA dhe Rusia vazhdojnë të bashkëpunojnë ngushtë pavarësisht luftës në Ukrainë.
Tre burra dhe një grua janë në një kapsulë të përdorur në hapësirë katër herë më parë nga firma SpaceX e Elon Musk. Ata planifikojnë të bëjnë eksperimente të ndryshme.
Studimi i tyre do të përfshijë rritjen e kopjeve artificiale të organeve njerëzore për të studiuar sëmundjet degjeneruese në mjedisin me gravitet të ulët, gjë që nuk është e mundur në Tokë.
Ekuipazhi u nis nga Qendra Hapësinore Kennedy në Florida në orën 22:53 me kohën lokale.
Përpjekja e parë e lëshimit të shtunën ishte anuluar për shkak të erërave të forta.
Matthew Dominick është udhëheqësi i misionit dhe së bashku me kolegen amerikane Jeanette Epps dhe rusin Alexander Grebenkin, po bën fluturimin e tij të parë në hapësirë.
Anëtari tjetër i ekuipazhit është mjeku Michael Barratt, në vizitën e tij të tretë në ISS.
Stacioni Ndërkombëtar i Hapësirës është një zonë e rrallë e bashkëpunimit ndërkombëtar midis qeverive të ndryshme globale dhe mirëmbahet nga agjencitë hapësinore të Kanadasë, Evropës, Japonisë, Shteteve të Bashkuara dhe Rusisë.
