Orë dramatike janë shënuar gjatë orëve të fundit në vendin fqinj Itali e në veçanti në rajonet jugore të saj, Kalabri, Sicili e Sardenja.
Vatra të shumta zjarri kanë përfshirë mijëra hektarë tokë bujqësore, zona pyjore e qendra urbane duke shkaktuar dhe viktima.
Korrespondentja e Rtv Ora në Itali në një lidhje nga Kalabria ka raportuar se janë mbi 300 ndërhyrje të zjarrfikësve e 7 avionë zjarrshues që kanë punuar gjatë natës së shkuar e gjatë orëve të fundit të ditës, për shuarjen e flakëve.
Kryeministri italian Mario Draghi ka firmosur një draft-ligj i cili ka urdhëruar që reparte speciale të Departamentit të Mbrojtjes Kombëtare Civile të vijnë në ndihmë të rajonit të Kalabrias.
Ndërkohë Prefektura e këtij rajoni ka kërkuar ndërhyrjen e forcave të ushtrisë për menaxhimi e situatës.
Nën koordinimin e qeverisë qendrore po bëhet gjithnjë e më e fortë ideja e krijimit të një Task Force për përballimin e kësaj situate.
Flakët e zjarri kanë përfshirë gjatë natës dhe zonën pyjore në komunën Aspromonte e cila është një pasuri natyrore nën mbrojtje te Uneskos.
Deri më tani zjarret kanë shkaktuar dy viktima në Kalabri e një viktimë në Sicili.
Autoritet policore italiane po patrullojnë nga ajri për të kontrolluar territorin e kanë identifikuar dhe persona që qëllimisht kanë shkaktuar zjarrvënie në disa zona të caktuara.
Flakët e zjarrit kanë shkaktuar dëme të mëdha ekonomike për fermerët si dhe dëme ambientale natyrore të pallogaritshme.
Ekspertët klimatikë italianë informojnë se temperatura e larta e thatësira ka shkaktuar një event klimatik të paprecendentë në Itali me temperatura mbi 45 gradë. E gjatë këtyre orëve janë 8 qytete jugore italiane nën alarmin e kuq të temperaturave deri në 47 gradë.