Burgosja e Navalnyt përplas superfuqitë/ SHBA: Lirojeni urgjentisht, Rusia: Ju sugjerojmë të shihni punën tuaj

137
Sigal

Një gjykatë ruse në Moskë urdhëroi sot dënim me burg prej më shumë se 2 vite e gjysmë për kritikun më të ashpër të Kremlimit, Alexei Navalny, nën akuzat e shkeljes së rregullave të një dënimi me kusht të vitit 2014, gjatë kohës sa po shërohej në Gjermani pas helmimit me një agjent nervor, për çka ai akuzon Kremlinin.

Shtetet e Bashkuara janë shprehur thellësisht të shqetësuara nga dënimi me burg i Navalny-t duke përsëritur thirrjen për lirimin e menjëhershëm të tij.

“Përsërisim thirrjen tonë për qeverinë ruse që menjëherë të lirojnë pa kushte zotin Navalny, si dhe qindra qytetarët rusë të arrestuar padrejtësisht javëve të fundit për ushtrimin e të drejtave të tyre, ku përfshihen liria e shprehjes dhe e drejta për tubim paqësor”, thuhet në reagimin e Departamentit amerikan të Shtetit.

“Ne do të koordinohemi ngushtë me aleatët dhe partnerët tanë për ta mbajtur Rusinë përgjegjëse për dështimin në respektimin e të drejtave të qytetarëve të saj”, thuhet ndër të tjera në reagim.

Nga ana tjetër, Ministria e Jashtme ruse refuzoi thirrjet e perëndimit për lirimin e kritikut të burgosur të Kremlinit duke i quajtur ato si reagime që nuk kanë lidhje me realitetin.

“Mos ndërhyni në punët e brendshme të një shteti sovran. Ne sugjerojmë që të gjithë të merren me problemet e tyre”, citohet të ketë thënë zëdhënësja e ministrisë së jashtme Maria Zakharova.