Duhej një alamet burri për të drejtuar komisionin hetimor Parlamentar që do të shqyrtojë kërkesën për shkarkimin e Presidentit të Republikës Ilir Meta. Ai u gjend, besojeni apo jo gati është fakt i kryer. Do të jetë Ulsi Manja në krye të komisionit, këtë e ka vendosur sot kryesia e Partisë Socialiste. Në krah të Manjës do të jenë tetë deputetë të mazhorancës, si dhe deputetët të vetëshpallur si opozitarë në parlamentin qesharak.
Ai është një nga shumë zyrtarë të lartë të PS-së që iu publikuan audiopërgjimet në gazetën gjermane Bild, ku flitët për shitblerje votash, përfshirje të botës së krimit në masakrën elektorale të mbështetur nga zyrtarë të lartë të Rilindjes.
“Ulsi Manja: Ku je mer vlla? Robert Aga:Në Peshkopi ? C’bëni mo? Ulsi Manja:Hic më me kryeministrin. Robert Aga: Ej, mu më duhet me shku pak atje. Ulsi Manja: Ku mer? Robert Aga: Te Bulqiza, po u ndërruam. Ulsi Manja:Ne themi për të shkosh për ma lart mer burrë. Robert Aga: Mirë më mirë ju e dini, por unë kam qef dhe atë. Ulsi Manja: Tani a do më dëgjosh mu, bisedo me Xhemalin se kët e kam si shefin e komisionit të sigurisë, ne bëjmë llafe të vish për ma nolt, për nai gjo ma të madhe, se mu mduken gjona të vogla ato o miku im…”. Kjo është biseda ku Manja flet hapur e troç me shefin e Komisariatit të Dibrës në vitin 2016, vetëm pak orë pasi nuk u kishte dalë akoma dehja, deri në ekstazë e grabitjes së votave në bashkinë Dibër.
Ky personazh grotesk, me doktoraturë të dyshuar për plagjiaturë (të kopjuar), flet për emërime nepotike në strukturat e larta të Policisë së Shtetit. Duhet të ishte “zhdukur nga politika”, por në Rilindje, kushdo që merret me shitblerje votash, ngjitet edhe ma nalt. “Thash për ma nalt o burrë”…
Dhe Rama e ka vendosur Ulësin ma nalt. Ky do të jetë udhëheqësi i një grupi hetimor Parlamentar që do kërkojë shkarkimin e kreut të shtetit Ilir Meta, me pretendimin se ka shkelur kushtetutën e vendit kur anuloi zgjedhjet e 30 qershorit dhe dekretoi datën 13 tetor.
Nuk është e vështitrë që në atë komision të dalin edhe deputetë tjerë të zellshëm që do ngrenë duart përpjetë sipas urdhrave të Ulsi Manjës, që në fund me shumë gjasë do të kurorëzohet në vendimin për shkarkimin e kreut të shtetit Ilir Meta. Personazhe të diskredituar publikisht, po mbahen gjithnjë e më lart në detyra nga kryeministri Edi Rama.
Për të, kjo është një formë mirënjohje dhe garanci që u jep. Kushdo që është përfshirë në histerizmin qeveritar të blerjes së votave, ndikimit në rezultate zgjedhore në favor të Rilindjes, gjithnjë do të promovohet.
Ulësi, sado qesharak në shprehje dhe qëndrime të duket, është i “rëndësishëm” në Rilindje. Ai ka dorë të zgjatur deri në Prokurorinë e Përgjithshme. Madje e çon dorën “poshtë” e “nalt”…!
Boldnews.al
