Anija kozmike Hope ka dërguar përsëri në Tokë imazhet më të mprehta të marra ndonjëherë të Deimos, sateliti më i vogël i planetit Mars.
Hope u nis në 20 korrik 2020 nga Qendra Hapësinore Tanegashima në Japoni, si pjesë e misionit të parë ndërplanetar të Emirateve të Bashkuara Arabe, i pari nga një vend i botës arabe.
Është hera e parë që nga misioni Viking në Mars (1977) që një anije kozmike i afrohet Deimos, thanë zyrtarët e Misionit Mars të Emirateve (EMM) sot gjatë Asamblesë së Përgjithshme të Unionit Evropian të Gjeoshkencave (EGU) në Vjenë.
Falë kamerës EXI që ofron imazhe me ngjyra me rezolucion të lartë, Hope ka zbuluar “anën e errët” të hënës më të vogël të Marsit. Deimos është rreth 23,000 kilometra larg Planetit të Kuq dhe shkencëtarët janë ende të pasigurt për origjinën e tij.
???????? NEW: UAE’s Hope probe has made stunning observations of Mars’s tiny moon Deimos and its far side. Findings suggest it’s not a captured asteroid after all… (1/2) pic.twitter.com/41ZLxp777k
— Sarwat Nasir (@SarwatNasir) April 24, 2023
“Ne nuk jemi të sigurt për origjinën e Deimos,” vuri në dukje menaxheri i misionit EMM Hesa al-Matroushi. Sipas teorisë më të përhapur, “këto janë asteroidë të kapur në orbitën e Planetit të Kuq”.
Megjithatë, vëzhgimet e Hope përforcojnë një teori krejtësisht të ndryshme, që Deimos lindi nga brenda Marsit. Thuhet se shkëmbi ka qenë pjesë e Planetit të Kuq, i shkëputur nga një goditje e dhunshme dhe më pas është kapur në orbitën e Marsit.
Duke komentuar imazhet e Deimos në Twitter, kryeministri i Emirateve të Bashkuara Arabe, Mohammed bin Rashid al Maktoum, shkroi në postimin e tij se sateliti ishte pjesë e Marsit, nga i cili “u nda miliona vjet më parë”.
Anija kozmike Hope do të vazhdojë të vëzhgojë Deimos gjatë gjithë vitit 2023 për të mbledhur më shumë të dhëna, tha agjencia hapësinore e Emirateve të Bashkuara Arabe, e cila ka vendosur të zgjasë misionin edhe për një vit. Vendi më i pasur i Gjirit gjithashtu aspiron të dërgojë një mjet robotik pa pilot në Hënë në vitin 2024.
