Vendimi/Hyn në fuqi vendimi për kompensimin financiar të pronarëve
Hyn në fuqi vendimi i qeverisë, që ndryshon procedurat dhe kriteret për kompensimin financiar të pronarëve, për vitin 2013. Në Fletoren Zyrtare është botuar tashmë vendimi që përcakton dy kritere kryesore për përfitimin e kompensimit; kriterin që vendimi për njohjen e pronës të jetë përfundimtar dhe jashtë proceseve gjyqësore; dhe kriterin që prona të mos i jetë nënshtruar më parë proceseve të kthimit apo kompensimit. Referuar VKM, ky proces krijon mundësinë e kompensimit financiar duke respektuar radhën kronologjike të vendimeve për kompensim. Kompensimi i pronës së llojit truall do të kryhet në bazë të çmimit të përcaktuar në hartën e vlerës së miratuar, sipas vendndodhjes së pronës që kompensohet. Masa e kompensimit të pronës do të jetë gjithashtu sipas skemës të aplikuar në vitin 2012, pra në varësi të sipërfaqes së pronës së njohur për kompensim.
Kriteret dhe dokumentacioni
Vendimi më i fundit i qeverisë, i cili tashmë ka hyrë në fuqi, përcakton se subjektet e shpronësuara, prona e të cilave është njohur për kompensim, do të kompensohen sipas radhës kronologjike, të përcaktuar nga numri dhe data e vendimit vetëm nëse përmbushen këto kritere: Vendimi që ka përcaktuar kompensimin e pronës është përfundimtar; vendimi që ka përcaktuar kompensimin e pronës është i ekzekutueshëm; vendimi për të cilin aplikohet, nuk është trajtuar asnjëherë me kompensim. Në rastin e vendimeve, të cilat janë ndryshuar pjesërisht, për efekt klasifikimi do të merren numri dhe data e vendimit bazë, që është më i hershëm në radhë kronologjike për njohjen, kthimin dhe kompensimin e asaj prone. Kompensimi për pronën e llojit truall, do të bëhet në bazë të çmimit të përcaktuar në hartën e vlerës, të miratuar sipas vendndodhjes së pronës që kompensohet. Masa e kompensimit do të jetë sipas skemës së mëposhtme: për pronat e njohura për kompensim deri në 1500 m², masa e kompensimit do të jetë deri në 200 m². Për pronat e njohura për kompensim mbi 1500 m² deri në 3000 m², masa e kompensimit të jetë 300 m². Për pronat e njohura për kompensim mbi 3000 m² deri në 5000 m², masa e kompensimit të jetë 400 m². Për pronat e njohura për kompensim mbi 5000 m² deri në 10 000 m², masa e kompensimit të jetë 500 m². Për pronat e njohura për kompensim mbi 10 000 m², masa e kompensimit të jetë 600 m². Subjektet, që kanë depozituar kërkesat e tyre në vitet 2006, 2007, 2008, 2009, 2011 dhe 2012 dhe që vërtetojnë kryerjen e pagesës, nuk do të paguajnë tarifën e aplikimit për vitin 2013. Pronarët që aplikojnë për përfitim në bazë të këtij vendimi, duhet të plotësojnë dhe të paraqesin pranë AKKP dokumentacionin e mëposhtëm: kërkesën për kompensim në të holla; deklaratën për pranimin e kritereve për kompensim dhe të kushteve të tjera që lidhen me to; titullin për njohjen dhe kompensimin e pronës, që, sipas rastit mund të jetë vendim i Komisionit të Kthimit dhe Kompensimit të Pronave, vendim i Agjencisë së Kthimit dhe Kompensimit të Pronave, si dhe vendimi i gjykatës, në rastet kur vendimet e sipërpërmendura janë ndryshuar me gjyq; planvendosjen, si dhe planin e rilevimit aktual të pronës së njohur për kompensim; dëshminë e trashëgimisë ose prokurë të posaçme të nënshkruar nga të gjithë trashëgimtarët e ligjshëm apo disa prej tyre, ku të jetë e përcaktuar tagri për të tërhequr shumën e parave në rast se shpallen fitues; vendimet e KKP-së/ZRAKKP ku janë përcaktuar pjesët takuese të secilit bashkëpronar, në rastet kur aplikimi kryhet nga një pjesë e trashëgimtarëve përfitues; çdo akt tjetër gjyqësor apo administrativ, me anë të të cilit provohet pjesa takuese e secilit bashkëpronar; dokumentin e identifikimit (letërnjoftim apo pasaportë) të përfaqësuesit të pajisur me prokurë; mandatpagesa. Procesi i regjistrimit/pranimit të kërkesave për kompensim fillon menjëherë pas hyrjes në fuqi të këtij vendimi dhe vazhdon për 15 ditë. Paraqitja e të dhënave të rreme ose fshehja e tyre nga subjektet e shpronësuara, në zbatim të këtij vendimi, sjell përjashtimin e menjëhershëm të këtyre subjekteve nga procedura e kompensimit në të holla dhe i ngarkon ata me përgjegjësi penale, sipas legjislacionit në fuqi.
