Ervin Resuli, njëkohësisht ekspert i problemeve bujqësore e blegtorale dhe kryetar i Shoqatës Mbrojtes Konsumatorëve dhe Prodhuesve Vendor ka denoncuar abuzimin me çmimin e bulmetit në vend. Resuli ka publikuar një tabelë me çmimet e produkteve të bulmetit ku nga viti i shkuar ka një rritje me 38%. Ai e quan këtë makutëri, ndërsa shpjegon se “karteli” i qumështit pasi fiton nga blegtori, fut dorën edhe te xhepi i konsumatorit.

Makutëria e “kartelit të qumështit ” s’ka kufi ! Të pangopur me fitimet që arkëtojnë nga qumështi blegtorët sot zgjatën dorën dhe në xhepin e konsumatorit.Të rrisësh çmimin me 38% mbi fitimet që ke pasur nga çmimi më parë është t’u fusës dorën në xhep konsumatorëve. Autoriteti i Konkurrencës, Autoriteti Kombetar i Ushqimit, Drejtoria e Përgjithshme e Tatimeve duhet të hetojnë këtë abuzim në dëm të konsumatorit, kartelat teknike të prodhimit të nënprodukteve të qumështit duhet hetuar për abuzime të rënda që bën industria e qumështit! Stop abuzimit. Siguria ushqimore = siguri kombëtare. Ushqim=jetë.

Çmimet e djathit dhe gjalpit do rriten sërish nga 15 shkurti

Sektori i blegtorisë dega më e madhe e bujqësisë shqiptare po kalon një periudhë të vështirë për shkak të reduktimit të numrit të krerëve. Braktisja e fshatit nga emigracioni i brendshëm dhe i jashtëm ka ulur ndjeshëm popullsinë në fshat çka po çon në rënien e shpejtë të fermave të vogla me kafshe me një deri 5 krerë.

Kompanitë e mëdha të përpunimit të qumështit kanë lajmëruar të gjitha pikat e shitjes me pakicë se, duke nisur që nga 15 shkurti, furnizimet e reja me gjalpë dhe djathë do të kenë çmime deri në 37% më të larta. Sipas listës bashkëngjitur që kompanitë kanë dërguar në pikat e pakicës, rritjen më të madhe e pësojnë djathi dhe gjalpi kryesisht i prodhuar nga qumështi i deles. Burimet nga kompanitë e përpunimit të qumështit pohuan se kjo rritje është aplikuar për shkak të shtrenjtimit të çmimit të qumështit nga fermerët gati me 50 për qind.

Sipas monitor bëhet fjalë për qumështin e deles, ku fabrika e përpunimit nga më të mëdhatë në vend tha se po e blejnë 1 litër qumësht me 160 lekë nga 110 që ishte më parë.

Por blegtorët që janë në të njëjtën zonë me fabrikën që rriti çmimin pohuan se, ndryshimi i fundit i çmimit të qumështit ishte në shtator 2022.

Rolandi, i cili ka një fermë me mbi 300 krerë dele në zonën e Beratit tha se po e shet 1 litër qumësht nga i deles me rreth 110 lekë ndaj fabrikave.

Çmimi i qumështit te blegtori shkoi në këtë nivel në fillim të vjeshtës së kaluar dhe fabrikat e kanë reflektuar në rritjen që kanë aplikuar më vonë gjatë tetorit.

Një litër qumësht i lopës pa TVSH shitet me 75 lekë aktualisht nga fermat e mëdha, ndërsa nga fermerët e vegjël me më pak se 15 krerë jo më shumë se 55 lekë. Ndërsa qumështi i deles në fermat e mëdha shihet me 110 lekë për litër dhe në të voglat jo më shumë se 80 lekë.

Shumica e fermerëve që kanë ferma të vogla dhe që janë furnitorët kryesore të fabrikave të përpunimit shesin me çmim shumë më të ulët për shkak të sasisë së limituar të prodhimit.

Sektori i blegtorisë dega më e madhe e bujqësisë shqiptare po kalon një periudhë të vështirë për shkak të reduktimit të numrit të krerëve. Braktisja e fshatit nga emigracioni i brendshëm dhe i jashtëm ka ulur ndjeshëm popullsinë në fshat çka po çon në rënien e shpejtë të fermave të vogla me kafshë me një deri 5 krerë.

Stallat e mëdha të mbarështimit të kafshëve e patën të vështirë mbijetesën nga rritja e kostove të ushqimit, e cila në një masë të madhe importohet nga jashtë.

Dobësitë në prodhim kanë bërë që çmimet e bulmetit të rriten me ritme jo të zakonta dy vitet e fundit. Vitin e kaluar kompanitë e përpunimit të qumështit rriten me disa valë çmimet në pakicë për qumështin dhe nën produktet e tij.

INSTAT raportoi se në muajin dhjetor të vitit 2022, çmimet e qumështit dhe nënprodukteve të bulmetit ishin rreth 25% më të larta se në dhjetorin e vitit 2021. Bulmeti ishte grupi me rritjen më të lartë të çmimeve të ushqimeve.

Blegtorët raportuan se, çmimet e qumështit do të rriten gjatë muajit në vijim për shkak të rritjes së kërkesës në kushtet kur mungon rritja e prodhimit.