Një 33-vjeçar i shpallur në kërkim për prodhim të lëndëve narkotike dhe pjesë e një grupi të strukturuar kriminal, është arrestuar nga policia e Lezhës.
Sipas uniformave blu, në pranga është vendosur 33-vjeçari Fatjon Marku. Ai është ndaluar në dalje të qytetit të Lezhës teksa qarkullonte me makinë.
Në 28 dhjetor të vitit të kaluar, Gjykata e Posaçme kundër Korrupsionit dhe Krimit të Organizuar (GJKKO) e dënoi të riun me 14 vite burg në mungesë për prodhim narkotikësh dhe grup të strukturuar kriminal.
Njoftimi i policisë:
Finalizohet nga Policia e Lezhës, operacioni policor i koduar “BAOFENG”, për kapjen e personave të shpallur në kërkim.
Vihet në pranga një shtetas i shpallur në kërkim, i dënuar me 14 vjet burgim, për veprat penale “Prodhimi dhe shitja e narkotikëve”, kryer në formën e grupit të strukturuar kriminal, “Grupi i strukturuar kriminal”, “Armëmbajtja pa leje” dhe “Kundërshtimi i punonjësit të policisë së rendit publik”.
Procedohet penalisht për veprën penale “Moskallëzim krimi”, drejtuesi i mjetit në të cilin udhëtonte si pasagjer shtetasi në kërkim.
Sekuestrohen një armë të ftohtë (thikë) dhe 1 radio marrëse-dhënëse si ato të Policisë.
Shërbimet e Komisariatit të Policisë Lezhë, në bashkëpunim me Forcën e Posaçme “Shqiponja” të DVP Lezhë, në vijim të punës për kapjen e personave të shpallur në kërkim dhe vënien e tyre para përgjegjësisë ligjore, në bazë të informacioneve të siguruara në rrugë policore, së në një automjet që lëvizte në drejtim të Lezhës, qarkullonte një shtetas në kërkim, kanë organizuar menjëherë punën dhe në dalje të Lezhës, kanë lokalizuar mjetin e dyshuar, duke finalizuar me sukses operacionin “BAOFENG”, në kuadër të të të cilit u bë kapja dhe ndalimi i shtetasit:
-Fatjon Marku, 33 vjeç, banues në Lezhë.
Ky shtetas është kapur nga shërbimet e Policisë, duke qarkulluar si pasagjer në mjetin me drejtues shtetasin F. K., i cili nuk i është bindur urdhrit të punonjësit të Policisë për të ndaluar, por pas disa minutash ndjekjeje, në bashkëpunim me shërbimet e qarkullimit rrugor, është bërë i mundur ndalimi i mjetit.
Shtetasi Fatjon Marku ishte shpallur në kërkim, pasi Gjykata e Rrethit Gjyqësor Shkodër, në vitin 2018, I ka vendosur masën e sigurisë “Arrest në burg “, për veprën penale “Prodhimi dhe shitja e narkotikëve”.
Gjithashtu, me vendimin e datës 28.12.2021, Gjykata e Posaçme kundër Krimit të Organizuar dhe Korrupsionit e ka dënuar me 14 vite burg, për veprat penale “Prodhimi dhe shitja e narkotikëve”, kryer në formën e grupit të strukturuar kriminal, “Grupi i strukturuar kriminal”, “Armëmbajtja pa leje” dhe “Kundërshtimi i punonjësit të policisë së rendit publik”.
Gjatë kontrollit të ushtruar ndaj këtij shtetasi, shërbimet e Policisë gjetën dhe sekuestruan një armë të ftohtë (thikë) dhe 1 radio marrëse-dhënëse si ato të Policisë.
Në përfundim të veprimeve u procedua penalisht edhe drejtuesi i mjetit, shtetasi F. K., për veprën penale “Moskallëzim krimi”.
Materialet hetimore u referuan në Prokurorinë e Rrethit Gjyqësor Lezhë, për veprat penale “Prodhimi, shitja, mbajtja pa leje e armëve të ftohta”, “Mbajtja pa të drejtë e uniformës” në ngarkim të shtetasit Fatjon Marku dhe për veprën penale “Moskallëzim krimi” në ngarkim të shtetasit F. K.
