Të gjithë personat, të cilët kanë marrë një kredi në euro, do të mund ta kthejnë atë në lekë, në rast se ata paguhen në monedhën vendase. Këshilli Mbikëqyrës i Bankës së Shqipërisë ka marrë tre vendime në mbledhjen e djeshme, ku mes të tjerave janë edhe disa ndryshime në rregulloren “Për kredinë konsumatore dhe kredinë hipotekare”. Sipas njoftimit të Bankës Qendrore, këto ndërhyrje konsistojnë në disa aspekte. “Këto ndryshime synojnë shtimin e kërkesave për mbrojtjen e konsumatorit, me qëllim përafrimin e legjislacionit shqiptar me direktivat evropiane të kësaj fushe. Ndryshimet e miratuara, krahas disa kërkesave për bankat, parashikojnë dhe të drejtën e konsumatorit për të kërkuar konvertimin e kredisë në monedhën në të cilën gjeneron të ardhurat, si dhe shtimin e një shembulli ilustrues, që banka duhet t’ia vendosë në dispozicion konsumatorit si pjesë të informacionit parakontraktor, në rastet kur ai aplikon për një kredi në monedhë të ndryshme nga ajo e të ardhurave të tij”, thuhet në njoftimin e Bankës. Prej disa muajsh, Banka e Shqipërisë ka marrë një fushatë për de-euroizimin, duke synuar të pakësojë qarkullimin e monedhës së përbashkët evropiane në ekonominë vendase. Sipas Bankës Qendrore, procesi i zgjerimit të përdorimit të monedhës kombëtare në sistemin financiar dhe në ekonomi, (de-euroizimi) nuk është një objektiv vetëm për sistemin financiar, për sa kohë që përdorimi i valutës nga publiku në transaksionet e ndryshme, mbetet i gjerë. “Për këtë arsye, qasja për de-euroizimin duhet të jetë gjithëpërfshirëse ku edhe autoritetet e tjera të vendit mund të identifikojnë dhe të ndërmarrin masa të caktuara që cilat nxisin publikun dhe agjentët ekonomikë të rrisin shkallën e përdorimit të monedhës kombëtare në transaksionet e tyre”, nënvizoi Banka Qendrore.
