Më mposhtën zhgënjimet
Kësaj jete jam vërtitur
Pa u thyer nga mundimet
E keqja më erdhi nga s’e prisja
Më mposhtën zhgënjimet!
Aroma jote
Nga gjithë parfumet e kësaj bote
Aroma jote më pëlqen më shumë
Ajo më deh si verë e vjetër
Dhe më ngre në shpirt furtunë!
Në kujtesë më mbetën
“Fali, o Zot!”, – thashë për armiqtë e mi
Ndonëse pabesisht më gjuajtën pa arsye
Po sado që u mundova t’i fshi nga kujtesa
Në mendje më kanë mbetur emrat e tyre.
Afër dhe larg
Kur jemi bashkë zihemi e “grihemi”
Kur jemi larg tretemi nga malli
Kështu qenka thënë këtë botë “jallane”
Të shkretit njeri, s’i gjendet “karari”!
Fjalët e shpirtit
Thonë që fjalët e shpirtit
Ndjenja e mistere fshehin
Një zemër e ngrijnë si akull
Mbi një tjetër zjarrin hedhin.
Pyes hënën
Hëna sonte më duket e zbehtë
Si një sy që lëshon hije trishtimi
Dhe unë e pyes: Mos dhe ti, moj e bukur
Ndihesh e vetmuar dhe të ka mbytur pikëllimi?
Kur zgjohem nga ëndrra
Ëndrrat, janë ëndrra e zgjasin sa një natë
Drita e mëngjesit të fsheh nga sytë e mi
Kur zgjohem nën qerpikë kam mjegull trishtimi
Dhe lotët që më djegin nga malli për ty!
