Noti kujton dhe nderon veteranët: “Gjithmonë kampion!”
Për kontributin e tyre në sportet e ujit janë vlerësuar 20 figura që bënë historinë
Gjergj Vyshka
Ata janë të gjithë Kampion. Janë mbi të gjitha modele tek të cilat notarët e sotëm duhet të mbështeten për të qenë si ata. Dhe bukuria e gjithçkaje është fakti se noti shqiptar nuk i harron veteranët e vet. Kështu ka ndodhur dhe paraditen e së shtunës, ndërsa në ambientet e “Te Stela Resort” është organizuar Takimi i Brezave me motivacionin “Gjithmonë Kampionë”. Një takim mirënjohjeje për gjithçka që ata kanë bërë për ngritjen dhe rritjen e sporteve të ujit. Sot janë me thinja dhe në moshë, por dikur pushtonin pishinat, çanin detet e liqenet në Maratonat e ndryshme. Ndaj dhe Shoqata e Veteranëve, që drejtohet nga Sadik Mema, në bashkëpunim me Federatën Shqiptare të Notit nuk ka harruar të kujtojë të gjithë ata që kanë bërë historinë e sporteve të ujit në vendin tonë. Historia e notit tek të rinjtë, a janë veteranët modele për sportistët e sotëm apo, sa e ruajnë traditën notarët e sotëm?! Janë këto dilemat, rrjedhimisht sollën dhe pyetjet, jo vetëm për organizatorin Mema, por dhe për presidentin e Federatës Shqiptare të Notit, Agim Çiraku. E pse jo, këtë dilemë e kanë dhe ata që kanë bërë jehonë në notin shqiptar. Nuk duhet harruar se për këtë aktivitet një meritë të veçantë ka Dritan Mezini. Janë mbledhur veteranët, ka nga ata që kanë vite që nuk janë takuar me njëri-tjetrin. Kanë nga ata që nuk jetojnë më, për të cilët u mbajt dhe një minutë heshtje. Garuan, u nderuan, ndërsa i kanë premtuar njëri-tjetrit se do të takohen përsëri.
Nderimi për notarët
Janë nderuar me kupa në këtë aktivitet 17 ish-notarë, Emin Lishi, Shyqyri Kërpaçi, Liljana Busho, Shpëtim Kote, Skënder Muça, Jani Kurti, Albert Mustafaraj, Petrit Guma, Myrteza Didati, Hysen Haxhija, Ilir Gjebrea, Pavllo Kisi, Enver Murriqi, Mark Shestani, Andi Kongoli, Azem Plisi dhe Tomorr Damo. Po kështu është nderuar historiani i notit sarandiot dhe i Shqipërisë, Xhorxhi Vasili. Pa harruar presidentin e Federatës Shqiptare të Notit, Agim Çiraku, dhe atë të resortit “Te Stela”, Stefan Pinguli.
Garimi
E më pas natyrshëm dhe garat në pishinë, ndërsa është konkurruar në 25 dhe 50 metra stil i lirë, 25 dhe 50 metra shpinë, 25 dhe 50 metra bretkosë dhe 25 dhe 50 metra delfin. Kampion të vërtetë, ish-sportistë që Fair-Playn e kanë në ADN-në e tyre, ndërsa i japin njëri-tjetrin dorën e fitores. Ky ishte takimi i brezave të sportistëve të notit, atje ku i pranishëm ishte dhe Presidenti i Komitetit Olimpik Kombëtar Shqiptar, Viron Bezhani. Pra, noti në veçanti jep shembullin më kuptimplotë të kujtesës për ata që bënë historinë e këtij sporti.
Rezultatet teknike të takimit të mirënjohjes “Gjithmonë Kampion”
MESHKUJ
25 M FLUTUR PAVLLO LLUPO 18”18
25 M STIL I LIRË ALFREDO TROQE (55-59 VJEÇ) 16”89
25 M STIL I LIRË AGIM ÇIRAKU (60-64 VJEÇ) 16”25
25 M STIL I LIRË PANO XHIXHO (40-44 VJEÇ) 15”28
25 M BRETKOSË SKËNDER MUÇA 22”59
50 M FLUTUR ANDI KONGOLI 32”75
50 M BRETKOSË AGIM MURIQI 32”20
50 M SHPINË EMIN LISH I 59”56
50 M STIL I LIRË AGIM ÇIRAKU (60-64 VJEÇ) 37”44
50 M STIL I LIRË ALBERT MUSTAFARAJ (55-59 VJEÇ) 34”88
50 M STIL I LIRË MYRTEZA DIDATI (65-69 VJEÇ) 43”25
50 M STIL I LIRË ALDI GUGUSHKA (30-34 VJEÇ) 31”63
50 M STIL I LIRË PANO XHIXHO (40-44 VJEÇ) 30”88
100 M KATËRNOTIM PANO XHIXHO (40-44 VJEÇ) 1’25”84
100 M KATËRNOTIM ALBERT MUSTAFARAJ (55-59 VJEÇ) 1’25”45
100 M KATËRNOTIM MET KIKRI (60-64 VJEÇ) 1’28”90