Pas votimit të Artur Metanit si kreu i Inspektoriatit të Lartë të Drejtësisë, vjen edhe reagimi i Partisë Demokratike.
Përmes një deklarate për shtyp, selia blu shprehet ndër të tjera se, emërimi i Metanit, sipas saj, shërbëtor i kryeministrit Edi Rama, vulos dështimin e reformës, kapjen dhe polizitimin e drejtësisë.
Deklarata e plotë e PD:
“Sot u emërua si Inspektor i Lartë i Drejtësisë vartësi i Edi Ramës, vëllai i ish ministres dhe deputetes së tij. Artur Metani, që duhet të garantojë pavarësinë e drejtësisë nga politika, u emërua sot në kundërshtim me Kushtetutën dhe ligjet.
Sot është një ditë e keqe për demokracinë dhe drejtësinë në Shqipëri.
Emërimi i Artur Metanit në krye të Inspektoriatit të Lartë të Drejtësisë, në kundërshtim me Kushtetutën dhe ligjet, është një emërim partiak në një nga pikat kyçe të sistemit të drejtësisë, që verifikon dhe nis hetime për të gjithë gjyqtarët, prokurorët, si dhe për anëtarët e Këshillit të Lartë Gjyqësor dhe atë të Prokurorisë.
Vartës i Edi Ramës për vite me radhë, Artur Metani nuk do t’i shërbejë drejtësisë së pavarur. Ai është emëruar aty për të qenë shërbëtor i Edi Ramës. Me këtë emërim Edi Rama investohet personalisht kundër prokurorëve dhe gjyqtarëve që gjykojnë dosjet e korrupsionit, vjedhjen e votave nga qeveria e Edi Ramës apo lidhjet e tij me krimin e organizuar.
Emërimi i Artur Metanit, një militanti partiak, vartës i Ramës, vëlla i deputetes dhe ish ministres së Ramës është një tjetër zhgënjim i thellë për të gjithë shqiptarët që prisnin drejtësi të pavarur nga reforma në drejtësi e cila, me hapin e sotëm është pranë vdekjes klinike”.
Artur Metani u zgjodh gjatë seancës së sotme si kreu i ILD. Pro tij votuan 98 deputetë, ndërsa 9 të tjerë thanë Jo.
Lidhur me kandidimin e Metanit, Opozita ka akuzuar më herët kryeministrin Rama se po kap Inspektorin e Lartë të Drejtësisë.
Sipas selisë blu, Metani nuk mund të zgjidhet Inspektor i Lartë i drejtësisë pasi në 10 vitet e fundit ka mbajtur post politik ndaj përzgjedhja e tij është anti-kushtetuese.
