Tre persona janë arrestuar në flagrancë nga Muriqan, pasi u kapen me 23 kg kanabis. Burime zyrtare nga policia bënë me dije se pas hekurave përfundoi Maliq Kruja, 54 vjeç, banues në Tiranë. Arrestimi i tij u bë pasi është paraqitur në P. K. K. Muriqan në dalje të RSh., me mjetin e tij tip ‘Benz’ me targë DC187ZA, ku nga kontrolli i ushtruar në vijën e dytë u gjetën dhe u sekuestruan 23 kilogramë kanabis.
Po ashtu në këtë pikë kufitare u arrestuan edhe shtetasit, E. M., 31 vjeç, banues në Durrës dhe A. B., 26 vjeç, banues në Tiranë, pasi gjatë kontrollit të ushtruar në autobusin e linjës Shqipëri-Gjermani në sediljen e këtyre shtetasve, u gjet dhe u sekuestrua një sasi e vogël lëndë narkotike e dyshuar Cannabis Sativa.
Materialet iu referuan Prokurorisë për Krimet e Rënda Tiranë, në ngarkim të shtetasit Maliq Kruja, për veprën penale “Trafikimi i narkotikëve” parashikuar nga neni 283/a i Kodit Penal, ndërsa në ngarkim të shtetasve E. M. dhe A. B. u referuan materialet Prokurorisë së Rrethit Gjyqësor Shkodër për veprën penale “Prodhimi dhe shitja e narkotikëve” parashikuar nga neni 283 i Kodit Penal.
