Ministri i Drejtësisë, z. Ylli Manjani
ishte sot i pranishëm në tryezën e diskutimit të organizuar nga Prezenca e OSBE
në vendin tonë, e fokusuar në aplikimin e dënimeve alternative.
Pjesë e kësaj tryeze diskutimi të drejtuar
nga Kryetari i Prezencës së OSBE-së në Shqipëri, z. Bernd Borchardt, ishin edhe
Prokurori i Përgjithshëm, z. Adriatik Llalla, Drejtori i Shërbimit të Provës,
z. Ilir Qafa si dhe gjyqtarë e prokurorë.
Gjatë fjalës së tij Ministri Manjani
vlerësoi bashkëpunimin afatgjatë me OSBE-në, ndërsa theksoi se tema për
diskutim është nga më kritiket, duke qenë se ka të bëjë me efiçencën e sistemit
të ndjekjes penale në Shqipëri.
“Gjithnjë
e më shumë jam i bindur se ka një reflektim të së shkuarës në ndjekjen e sotme
penale dhe kjo nuk vjen për shkak vetëm të zbatimit por dhe mënyrës sesi i kemi
konceptuar ligjet e ndjekjes penale në Shqipëri. Miqtë e mi, burgu është mjeti
i fundit! Nuk mundet që në konstatimet e para të luhet me fjalën “dyshim i
arsyeshëm” pasi ky nuk është standart demokratik. Mund t’ju njoftoj që jemi në
një proces rishkrimi bashkë me prokurorinë dhe shoqatat e gjyqtarëve, të Kodit
të Procedurës Penale, i cili duhet të sqarojë në mënyrë shteruese se çfarë është
“dyshimi i arsyeshëm”. Në sistemin penitenciar, nga 6000 persona që kemi sot,
3200 pra më shumë se gjysma janë të paraburgosur dhe kjo nuk është efiçencë e
ndjekjes penale, për mos të folur dhe për mbipopullimin”,
tha Ministri Manjani
Ndërsa riktheskoi edhe njëherë se burgu
duhet konsideruar si një mjet i fundit, Ministri Manjani vlerësoi se ka mjete
alternative, shumë të efekshme dhe që shumë pak përdoren nga sistemi gjyqësor.
“Ka
një detyrim në Kushtetutë, sipas të cilit askush nuk mund të burgoset për
pamundësinë e shlyerjes së detyrimeve financiare, kontraktuale. Shumë e shumë
vepra penale për arsye të presionit pozitiv të klimës politike, që tenton t’i
zgjidhi shpejt gjerat dhe unë po e quaj presion pozitiv, por në fakt nuk është
aspak presion pozitiv për shkak se sjell si pasojë sekondare rëndimin e situatës
së ndjekjes penale. Kjo shton presionin mbi prokurorët, mbi oficerët e policisë
gjyqësore dhe e gjitha kjo shkarkohet në sallën e gjyqit. Këtë diagnosë të
situatës ku jemi duhet ta ndryshojmë. Duhet ta konsiderojmë burgun si mjet të
fundit dhe shërbimin e monitorimit elektronik të mbikqyrjes elektronike si
mjetin e parafundit, sepse nuk është e thënë që do të duhet të shkarkojmë një
paraburgim për të krijuar një paraburgim tjetër, ka mjete alternative, shumë të
efekshme dhe që shumë pak përdoren nga sistemi gjyqësor sot, të cilat duhet t’i
nxisim që të përdoren. Bllokimi i shtëpisë në hipotekë për llogari të
prokurorisë, ndalimi i lëvizjes jashtë shtetit, bllokimi i pasaportës, ndalimi
i ushtrimit të detyrës publike, etj, janë mjete efektive”,
u shpreh Ministri Manjani
Sipas Ministrit Manjani sistemi jonë
penal e ka humbur humanizmin për arsye të ndërhyrjeve amatoreske të bëra ndër vite
në lëgjislacionin penal.
“Procedurat
e faljes janë shumë të vështira për t’u aplikuar, amnistitë mbetën nisma politike
por këto jënë shumë masive dhe nuk arrihet të individualizohen për t’i trajtuar
ngjarjet rast pas rasti. Në qoftë se duam vërtet të jemi pjesë e hapësirës së
Bashkimit Europian, sistemi i ndjekjes penale duhet të jetë europian. Do të kërkoja
mirëkuptimin tuaj që ta rimbledhim këtë tryezë shumë shpejt për të diskutuar
edhe propozimet konkrete me qëllim që të arrijmë në një standart realisht
demokratik, që t’i përdorim mjetet alternative si mjete efiçente. Në shumë
raste t’i marrësh paratë dikujt si ndëshkim penal është më e shtrenjtë dhe më e
ndëshkueshme sesa ta mbash në burg me bukë dhe të shpenzosh dhe para. Kjo është
e vërteta dhe ne nuk kemi përse të mos e legjitimojmë këtë të vërtetë në
legjislacion dhe në praktikën e ndjekjes penale”,
përfundoi z. Manjani
