ARM: Ndotja, 100 herë më e lartë se 23 vite më parë
Qyteti i Elbasanit, prej afro 10 vitesh, po përjeton ndoshta nivelin më të lartë të ndotjes, edhe se para 23 viteve, kur në punë ishin 17 fabrikat dhe uzinat kineze të Kombinatit Metalurgjik. Agjencia Rajonale e Mjedisit në Elbasan, shpesh vitet e fundit ka tentuar ta ndalë ndotjen e shkaktuar sot nga i vetmi subjekt që është uzina e Çelikut, pronë e kompanisë turke “KURUM”, duke kryer kontrolle rutinë, apo edhe duke tentuar gjobitjen e saj. E ndërsa ARM ka tentuar, Komuna e Bradasheshit, e cila vjel nga KURUM miliona lekë taksa, ka toleruar me dashje ndotjen e fshatrave të saj, dhe për pasojë krejt qytetit të Elbasanit. Komuna e Bradasheshit shpesh ka qenë pjesë e debateve të ashpra mes saj dhe Bashkisë Elbasan, pasi kjo e fundit kërkon nga kjo njësi e vogël vendore, të vendosë masa urgjente ligjore për të ndalur ndotjen masive nga oxhakët e furrat e KURUM. Çdo ditë tek dogana e Elbasanit, vijnë me dhjetëra maune me hekurishte jashtë standardit nga Kosova e Maqedonia, për t’u shkarkuar në uzinën e Çelikut KURUM, duke çliruar nga shkrirja e tyre gazra helmues e duke ndotur, veç të tjerave edhe 12 fshatrat e Bradasheshit. Qytetarët e Elbasanit, prej vitesh kanë nisur me qindra letra, sms dhe peticione proteste në Kryeministri, Ministritë e linjës, deputetëve, duke kërkuar vendosjen e filtrave në uzinën e Çelikut KURUM, për të ulur dhe monitoruar nivelin e ndotjes. Përfaqësuesit e kësaj kompanie turke, gjithmonë kanë premtuar vendosjen e sistemit të filtrave, gjithmonë kanë deklaruar se “kemi investuar kaq e aq milionë dollarë”, por qytetarët e Elbasanit dhe banorët e fshatrave të Komunës së Bradasheshit nuk kanë parë asnjë ndryshim. Ata janë pjesë e ndotjeve nga tymi, gazrat dhe helmet që dalin nga oxhakët e prodhimit kinez të viteve 1970 të ish-Kombinatit Metalurgjik, e përfundojnë në oborret e pallatet e tyre. Institucionet e shtetit (veç Bashkisë e cila gjithmonë përmes kryetarit të saj Sejdini ka ngritur zërin) si ARM, Prefektura, Komuna e Bradasheshit, dhe dikasteret qeveritare, bëjnë veshin shurdhër dhe syrin qorr, kur banorët trokasin dhe ngrenë shqetësimin e ligjshëm për ndotjen alarmante të shkaktuar nga KURUM. Burimet të sigurta thanë se “KURUM, ka mundur t’i mbyllë gojën drejtuesve të komunës Bradashesh, ARM, dhe deri ministrave të çdo qeverie që ka ardhur në Shqipëri në vitet e tranzicionit, duke rënduar mbi jetën e qytetarëve elbasanas”. Asnjë reagim nuk ka patur edhe nga këshilltarët vendorë. I vetmi që ka vite që ngre zërin për rritjen alarmante të nivelit të ndotjes në Elbasan, është kryetari Bashkisë Sejdini, i cili nuk ka gjetur përkrahje deri sot jo vetëm nga këshilltarët e PD-së dhe PS-së, por edhe nga ish-ministrat e qeverisë së shkuar. Qytetarët e Elbasanit, por edhe banorët e komunës së Bradasheshit, kërkojnë të ndalet katastrofa e ndotjes nga KURUM. Në çdo vend tjetër të Europës, një kompani e tillë, që ndot qytetin dhe mjedisin në nivele alarmante do të merrte ndëshkimin më të ashpër ligjor nga shteti. Një shtet që bëhet palë me ata që shkelin ligjin, një shtet që del kundër qytetarëve të vet, jetës dhe shëndetit të tyre, një shtet që bëhet spektator kur ndoten qytetet, mjedisi , fauna dhe flora, këto vlera të çmuara, ai është shtet i kalbur nga themelet. Qytetarët e Bradasheshit dhe të Elbasanit, apelojnë për ndërhyrjen e strukturave të shtetit, për përgjegjshmëri nga Agjencia Rajonale të Mjedisit, e cila është inekzistente në këtë qytet, për të ndalur dorën vrastare të një kompanie të huaj e cila nuk pyet për ligjet dhe tallet me fatin e 140 mijë banorëve të këtij rajoni. Elbasanasit i kërkojnë qeverisë dhe Kryeministrit Rama të mbajë premtimin e fushatës, për “Një Elbasan të pastër”.
