Ka mbi dy dekada , që mes Prizrenit dhe Kukësit , zhvillohet një turne në shah. Këtë veprimtari për herë të parë e mori përsipër klubi i shahut të qytetit historik , Kosovës , i cili për ta kujtuar eksodin e madh dhe tragjik të luftës së Serbisë ndaj Kosovës e quajti me slogon ‘’Faleminderit Kukës ‘’. Turneu përkaq vite , organizohet me vajtje ardhje. Inisjator të turneut , fillimisht kanë qenë Berat Batiu , një emër i dëgjuar dhe i njohur andej nga Kosova dhe Shukri Gucaj nga Katundi i Vermicës të rrethinave të Prizrenit dhe nip gjyshi i tij në fshatin Kalimash të Kukësit . Kukësi , duke qenë se ekipi i tij ka një shtrirje më të madhe ka marrë në përbërjen e tij edhe shahistë nga qyteti i Krumës dhe Bajram Curri të Tropojës . Gjithashtu Kukësi , turneun e ka organizuar edhe në Kukës , Krumë dhe Tropojë kur kanë qenë kryetar bashkie përkatësisht Hasan Halilaj e Bashkim Shehu , Liman Morina, Adem Lala dhe Besnik Dushaj. Në të gjitha veprimtaritë , turnetë janë organizuar me masa të mira dhe rregullore të përcaktuara , madje janë shpërndarë stimuj të ndryshëm , qoftë për shahistët që janë dalluar e zanë vende nderi dhe drejtuesit e klubeve. Gjithashtu pjesëmarrësit , jo vetëm kanë luajtur mes tyre , por janë bërë edhe vizita në vendet historike , njohjen e qyteteve etj. Ky turne i përvitshëm dhe me shumë mbresa , duhet të jetë nxitje dhe shembull edhe për sportet e tjera , jo vetëm që Kukësi e Prizreni janë shumë afër mes tyre , por me zakone , tradita e gjuhë shqiptare , që të rralla janë në shtetet fqinjë në Ballkan.
Në maj të 2024 , sipas traditës , turneu u zhvillua në qytetin e Prizrenit , në një lokal në zonën e Hasit andej nga ana e Kosovës .Pritja dhe gjithçka qe e mrekullueshme dhe me shumë mbresa. Në vitet e para të turneut mes dy shahistëve kundërshtare , kështu ishte menduar , luhej vetëm një takim. Ky ishte një duel , që mbante të papritura , i befasishëm , qoftë humbja dhe fitorja. Madje edhe lojtarët zgjidheshin jo sipas nivelit , diku një shahist i dobët , e diku një me nivel më të mirë. Dy vitet e fundit është vënë në funksion shorti , e diku është përcaktuar edhe rregullorja dhe vlerësimet për çdo lojtar dhe rezultatet përfundimtare. Këtë vit , si gjithnjë , u përpilua dhe u lexua para të gjithë pjesëmarrësve rregullore , që u aprovua unanimisht. U vunë përballë njëri-tjetrit 22 shahistë , përkatësisht nga 11 për çdo klub. Në tavolinën me nr. 8 janë përballë mes tyre Festim Kryeziu i Prizrenit dhe Bashkim Tota i Kukësit. Ndërkohë Bashkimi është hera e dytë që merr pjesë në një turne të tillë. Të gjithë garat paraqesin interesim dhe të papritura , por nuk mund të harrohet se klubi i Prizrenit në të gjithë takimet në pjesën më të madhe ka qenë fitues , e ndoshta nja tri apo katër herë edhe Kukësi. Në duelin Kryeziu-Tota hapjen e parë e fiton lojtari mik , nga Kukësi , por edhe takimin e dytë , e rrëmben Kryeziu, lojtar me mjaft provojë .Disa takime përfundojnë 2/0 , të tjerat mbyllen 2:1 e kështu me rradhë Gati turneu është në përfundim të ndeshjeve , por pritet me shumë interesim ajo e tavolinës me nr.8 Prizerjani është deri diku në epërsi. Sulmon gjithnjë në krahun e majtë për të bërë edhe një lojë spektakulare dhe me mjaft fantazi . Bashkimi edhe ai me atë dije e përvojë që ka lufton ta mposhtë kundërshtarin. Janë dorëzuar disa figura e ushtarë , më shumë të Bashkimit .Takimi mes tyre edhe i fundit që luhet sot në Prizren.
Atë e ndjekin edhe shumë tifozë , që shoqërojnë ekipet e tyre , por edhe lojtarët pjesëmarrës. Gara tani ka hyrë në një labirinth të vërtetë . Arma kryesore e Kryeziut është vetëm sulmi . Edhe kuksjani nuk dorëzohet , kërkon të sjellë të papritura . Por të dy rivalët luftën kryesore e zhvillojnë me mbretëreshat duke e mbështet edhe me figurat kryesore , por të pakta , me torrat , kuajt , oficerë , e ushtarët e shkretë , që lëvizin andej e këndej vetëm në një katror . Në një moment Bashkimi , si, qëllim për t’i marrë kundërshtarit një kalë osë torrën aty afër , e fut mbretëreshën mes tyre . Ajo në këto rrethana mbetet e izoluar , por vetëm mund të rrëmbejë kalin , që është edhe pak ‘’sakat’’. Kështu mbretëresha e Bashkimit , pa asnjë rrugë tjetër shpëtimi dorëzohet , por kapitulloi në një izolim e rrethim që nuk e priste asnjë nga shahistët pjesëmarrës. Fiton Festim Kryeziu me meritë dhe nderohet me kupën e turneut , si shahisti më cilësor dhe rezultativ . Në ceremoninë dhe drekën e organizuar , dikush nga shokët e tij e pyet Bashkimin : Si dole or Bashkim? : Ai i përgjigjet ,. Humba se më rrethoi mbretereshën. Të gjithë qeshëm dhe duartrokitën . Tani në Kukës të gjithë ata që e kanë mësuar historinë e rrethimin e mbretëreshës së Bashkimit , qeshin me të , por edhe i thonë : Kujdes me mbretëreshat , se ato kanë rrëzuar nga froni e mposhtë mbretër dhe pashallarë.
