Prej kohësh s’e ka parë njeri dashurinë,
pyeta disa në rrugë, por ngritën supet,
të tjerë më thanë: “- Qënke prapa bote,
edhe nga qarkullimi ajo po zhduket!
Zhurmojnë, se ka vdekur dashuria!
Tani ditët venë e vijnë bardhezi,
mbetur kujtim si negativë filmash
në një sirtar të vjetër nxjerrë në shi.
Pa keqardhje e tërhoqën zvarrë,
në direkët e kohës e kryqëzuan!
“-Është e vjetër, legjendare,” – thanë
dhe me valutë e zëvendësuan!
Duket se thërret nga lashtësia,
nxjerrë nga zbulimet arkeologjike
statujë pa kokë në një muze
endet në kohën kibernetike.
Një këshillë miqësore
Ndërsa çdo javë
shkon në flokëtore
dhe ndryshon flokët
nga të drejta në kaçurrela…
Ndërsa rezervon
për lyerjen e thonjve,
dhe i ndryshon
nga të kuq në të verdha…
Ndërsa planifikon
pushime familjare,
s’ka rëndësi,
në qoftë verë apo dimër…
Ndërsa ke marrë
bileta për teatër
dhe ditë tjetër shkon
të shikosh një film…
Ndërsa, blen çantë,
këpucë të shtrenjta
dhe vishesh me modën
e fundit ngjyrë hiri…
Ndërsa i bën këto
e shumë të tjera,
të lutem, rezervo një vizitë
për kancerin e gjirit!