Kohët e fundit doli nga shtypi libri më i ri me fabula të zgjedhura dhe të reja i autorit Gjikë Kurtiqi, titulluar “Mozaik”, përgatitur me rastin e 80-vjetorit të lindjes së tij. Me gjuhën e personifikuar të kafshëve, përmes satirës dhe humorit të hollë, fabulisti i mirënjohur prek dukuri që cënojnë moralin shoqëror, godet vese njerëzore dhe zakone negative frenuese ndaj realiteteve, përparimit e zhvillimeve. Shpesh, duke qëmtuar urtësinë popullore, autori stilizon në vargje me origjinalitet të spikatur, me fjalor të pasur e të ngjeshur, fabula, epigrame, tipa dhe karaktere njerëzore.
Dhe vjen ky libër i ri në prag të ndërrimit të viteve 2023 e 2024 si një përshëndetje e ngrohtë urimi për dashamirësit, lexuesit e kësaj gjinie dhe gjithë shqiptarët e kudondodhur nëpër Botë.
Gëzuar 2024! Mbarësi e përparim për shoqërinë dhe Kombin shqiptar, për të gjithë!
Botimet Finoku
Shoqata Kulturore “Naum Veqilharxhi”
***
Dy fabula dhe dy epigrame shkëputur nga ky vëllim:
Fabula
Shporta me karavidhe.
Karavidhet në shportë
qenë bërë lesh e li.
Tha zëdhënësja në konferencë:
“Jetojmë në harmoni!”
***
Këmisha dhe Lëkura
Në Parlament ditën e mërkurë
Këmisha debatoi me një Lëkurë:
– Unë – tha Këmisha e blerë
nga ti kam më shumë vlerë.
– Ke të drejtë – pohoi Lëkura.
Në këtë Parlament ka shumë burra,
që u vlen më tepër Këmisha nga Lëkura!
***
Epigrame
Një shitësi të djathit
nuk e dimë ku e ke mësuar
marifetin që s’e dije…
Djathin e qumështit pluhur
ti e shet për djathë dhije.
***
Dyshimi i një kritizeri
edhe më parë e kam theksuar,
për Vitin e Ri kam konsideratë,
por prapë le për të dyshuar
ardhja e tij në mesnatë!..