Pritej spektakël dhe goleadë, mirëpo përballja e vlefshme për javën e 13-të të kampionatit gjerman të futbollit, Bundesliga, Bayern Munich-Union Berlin, e planifikuar për t’u luajtur të shtunën e kaluar në orën 15:30 u shty për shkak të reshjeve të shumta të dëborës, që ranë në Mynih.
Pas shtyrjes së sfidës, këtë të martë është caktuar dhe data për zhvillimin e ndeshjes së prapambetur, teksa me anë të një postimi, në profilin e tyre zyrtar, në rrjetet sociale, klubi i Bayern Munich bën me dije se takimi i vlefshëm për javën e 13-të të Bundesliga është vendosur të luhet më 24 janar 2024, në orën 20:30.
“Ndeshja e shtyrë e FC Bayern, në Bundesliga, kundër Union Berlin është riorganizuar për të mërkurën, 24 janar 2024 në orën 20:30 në Allianz Arena. Ndeshja e 13-të ishte planifikuar fillimisht për t’u zhvilluar të shtunën e kaluar, por më pas u shty për shkak të sigurisë dhe kushteve të udhëtimit pas reshjeve të mëdha të borës në Mynih. Biletat për së shtunës mbeten të vlefshme për ndeshjen e riorganizuar”,- shkruhet në postimin e “bavarezëve”.
