INTERVISTA/ Flet për “Telegraf” Sajmir Patushi, ish-mesfushori i Tiranës e përshkruan garën me ulje e ngritje
Agron Kaja
Jemi në prag të ndeshjeve të javës së 28-të të Superiores, ju si e përshkruani rrugëtimin në tre fazat e para?
Mendoj se kanë qënë tre faza me ulje e ngjitje të skuadrave. Një vit jo i mirë për futbollin shqiptar, sepse edhe formula që është zgjedhur nuk i përshtatet skuadrave. Vendimmarrjet e presidentëve nuk i shkojnë ritmikave të skuadrave dhe futbollit.
Kjo javë vjen me kalendar interesant dhe me një “derbi” të kryeqytetit, mendoni se të gjitha sfidat do jenë të tilla?
Unë besoj se çdo javë në fazën e katërt do ketë ndeshje të forta në të dy kahjet e tabelës së renditjes, dhe java e 28-të për çdo ekip është si një finale. Ndërsa “derbi” i gjen dy ekipet me probleme, por mendoj se Tirana do fitojë. Do jetë sfidë e fortë.
Me gjithë rezultatet në tre fazat e luajtura, kreu dhe fundi i renditjes pak po lëvizin, pse ndodhi kështu në këtë javë?
Sepse nuk kemi një ekip lider që të bëjë diferenca të mëdha me të tjerat. Pra, nuk kanë stabilitet në rezultate, e këtu mendoj se ndikon shumë edhe formula me atë “Final 4”. Ndryshe do ishte një garë më e fortë, por do uroja një “Final 4” të fortë.
Mendoni se me këto rezultate në tre faza, “Final 4” e ka marrë një formë të përafërt?
Nuk e shikoj një “Final 4” pa Tiranën. Më duket si një “çmenduri” mos jetë edhe Tirana, ndërkohë që Egnatia, Partizani e Vllaznia e kanë siguruar një vend në këto ndeshje për titullin kampion dhe për një vend në Europë.
Java e kaluar nuk e preku asnjë bankinë, mendoni se në këtë periudhë nuk është momenti për largimin e trajnerëve?
Unë gjithmonë i kam kritikuar afrimet dhe largimet e shpeshta të trajnerëve gjatë kampionatit. Presidentët duhet që t’u besojnë më shumë trajnerëve, sepse gjithçka varet nga përzgjedhjet e tyre në fillimsezoni. Por, ky është futbolli shqiptar.
Kampionati do të ndërpritet për dy javë pasi Kombëtarja luan dy miqësore, si do ndikojë kjo te skuadrat e Superiores?
Unë besoj se skuadrat i kanë patur hapësirat për të gjeneruar lojtarët e tyre, për t’i rikuperuar ata. Më shumë kjo hapësirë dyjavore pa ndeshje zyrtare do të shërbejë për rikthime të lojtarëve të dëmtuar, por edhe për ndonjë rregullim taktik.
Dje Silvinjo e shpalli listën me emrat e futbollistëve për miqësoret me Kilin dhe Suedinë, ju si e shikoni?
Më vjen mirë që Silvinjo ka rikthyer tre futbollistë, të cilët për Kombëtaren tonë do jenë një e ardhme e mirë: Manaj, Broja dhe Kumbulla. Në 26 emrat veçoj edhe sulmuesin Arbër Hoxha, edhe pse reparti ofensiv duket i mbipopulluar.
Mendoni se trajneri do të formatojë një formacion me titullarë, që luajnë periodikisht me skuadrat e tyre në Europë e Botë?
Besoj se Silvinjo e ka të qartë se çfarë formacioni do të ndërtojë me këta futbollistë që ka në këtë listë. Idetë e tij janë të qarta dhe unë uroj që këto dy miqësore t’i shërbejnë konsolidimit të grupit tonë, që për ne është një grup “ferrri”.
Sa shërbejnë këto miqësore në këtë muaj, kur finalet e Europianit nisin në muajin qershor?
Unë besoj se një pjesë e mirë e ekipit tonë kombëtar është e konsoliduar. Ajo çka pret trajneri nga çdo individ, do të presim fundin e sezoneve. Por duhet thënë se Silvinjo do ta ketë të vështirë përzgjedhjen, ndaj edhe duhen këto miqësore.
Shpërblime dhe bonuse për fituesit në superiore
Në bazë të Rregullores së aktivitetit, veç 100 milionë lekëve të vjetër që ka marrë ekipi kampion, do të ketë edhe bonuse për skuadrat e “Final 4”. Kështu, vendi i parë do të marrë edhe 100 milionë lekë të vjetër shtesë, vendi i dytë 70 milionë lekë të vjetër, vendi i tretë 50 milionë lekë të vjetër dhe vendi i katërt 20 milionë lekë të vjetër. Për fituesin e Kupës, mbetet në 50 milionë lekë të vjetër.
ABISSNET SUPERIORE
NDESHJET, JAVA 28
E shtunë, 16 mars 2024
Erzeni-Laçi 14:00
Teuta-Partizani 17:00
Skënderbeu-Egnatia 17:00
E dielë, 17 mars 2024
Kukësi-Vllaznia 14:00
Tirana-Dinamo City 17:00
RENDITJA
Skuadrat Nd Pikë
1.Egnatia 27 51
2.Vllaznia 27 46
3.Partizani 27 46
4.Skënderbeu 27 37
5.Dinamo City 26 36
6.Tirana 27 36
7.Laçi 27 30
8.Teuta 26 28
9.Erzeni 27 26
10.Kukësi 27 22
KATEGORIA E PARË
NDESHJET, JAVA 25
E shtunë, 16 mars 2024
Bylis-Besa 14:00
Vora-Kastrioti 14:00
Flamurtari-Lushnja 14:00
Tomori-Luzi 2008 14:00
AF Elbasani-Burreli 14:00
E dielë, 17 mars 2024
Apolonia-Korabi 14:00
RENDITJA
Skuadrat Nd Pikë
1.AF Elbasani 24 56
2.Bylis 24 55
3.Vora 24 45
4.Flamurtari 24 45
5.Apolonia 24 35
6.Korabi 24 35
7.Burreli 24 28
8.Lushnja 24 27
9.Kastrioti 24 23
10.Besa 24 19
11.Luzi 2008 24 18
12.Tomori 24 14
Turne me veteranët, Shqipëria sfidon Flamurtarin e Hanoverin
Në datë 23 mars 2024, FSHF do të organizojë në “Shtëpinë e Futbollit” një turne ku do të zbresin në fushën e lojës veteranët e futbollit, me ndeshje që do të luhen tre takime. Turneu do të startojë në orën 12:00 me ndeshjen Shqipëri-Hanover. Më pas do të luhet ndeshja, Flamurtari-Hanover dhe turneu do të mbyllet me sfidën Shqipëri-Flamurtari. Kombëtarja e veteranëve të Shqipërisë që drejtohet nga trajneri Sulejman Mema, ndërsa FSHF po punon për të zyrtarizuar edhe një ndeshje miqësore për Kombëtaren e veteranëve të Shqipërisë në muajin prill.
