/Gazeta TELEGRAF
Trajneri Zef Gjoni , ose legjenda e gjallë e boksit shqiptar, siç e vlerësojën të gjithë jo vetëm në Shkodër, e pranon dhe vetë “se do të vazhdojë të kontribuojë me të gjitha forcat për boksin deri kur të shkoj në moshën 80 vjeç” e nënkupton qartë se sukseset e boksit shkodran dhe ekipeve të tjera të Vllaznisë do vazhdojnë të vargëzohen duke krijuar një mit të suksesit sportiv që pak kush e ka të tillë dhe në nivel evropian. Për të gjitha këto suksese të arritura Zef Gjoni është licensuar i pari dhe i vetmi në Shqipëri ,si trajner boksi nga Shoqata Botërore e Boksit A.I.B.A .(Internacion –Boxing Association) Dy emrat e njohur të boksit kosovar Mehmet Bodujevski dhe Azis Saliu që dekada më parë kanë prekur nivelet nënkampionit të botës dhe kampion olimpik, pak kohë më parë janë shprehur: ”Pjesmarrja dhe sukseset e boksierëve shqiptar në çdo garë të nivelit rajonal, ballkanik , mesdhetar dhe evropian personifikohet me punë serioze dhe shumë pasionante të trajnerit kombëtar Zef Gjoni”.
Dhe fakte të tilla janë , sepse që nga viti 1992, kur Vllaznia u shpall kampione Zef Gjoni vazhdon të jetë trajner i ekipit kombëtar , duke vazhduar t’i bëjë sfidë moshës dhe kushteve . “Memoriali Vllaznia” , kupa “Adem Jashari “ , “Gongu Artë “ , pjesmarrjet e rregullta të ekipeve shqiptare në në çdo garë të nivelit ndërkombëtare janë pjesë e punës dhe suksesit të tij në këto vite . Të gjitha këto kanë sjellë vlerësime, kualifikime dhe rritje të boksit shqiptar në ringun ndërkombëtar. Paraqitjet e fundit të boksierëve cilësor si Krenar dhe Rexhildo Zeneli, Arjon Kajoshit dhe Kritan Demës i japin optimizmin e duhur trajnerit Zef Gjoni që thotë:”Kemi një grup të mirë me boksierë të rinj që na japin besim për të kapur nivele edhe më të larta”. Gjithsesi kjo paraqitje e karrierës dhe sukseseve të këtyre tre dekadave të fundit si trajner për Zef Gjonin është vetëm një pjesë e veprimtarisë të tij sportive për më shumë se gjysëm shekulli të lidhur me sportin . Këtu ndikim ka pasur edhe fakti, se familja e njohur shkodrane Gjoni, ka qenë e lidhur me sportin e boksit që në fillim të viteve 1960, kur i vëllai Ndoja , i dënuar më vonë me disa vite burg , në vitet e shërbimit ushtarak ka boksuar për Partizanin . Por një dramë më vete ka qenë jeta dhe karriera sportive e vëllait tjetër, boksierit të njohur Ndoc Gjoni që së bashku me Viktor Martinin formonin në ato vite, atë dyshe shkodrane të jashtëzakonshme në ringun shqiptar.
Më parë me Dinamon, kur ishte 16 vjeç , në shkollën profesionale në Tiranë dhe më vonë tek Vllaznia, djaloshi Ndoc Gjoni do përndiqej nga regjimi si përkrahës i bindjeve fetare deri sa ai të tentonte të arratisej në 1968 dhe të dënohej me 12 vjet burg. Por edhe pas kësaj në 1980 ky “rebel” i regjimit do tentojë përsëri të arratisej jashtë vendit në kërkin të një jete më të mire. Dhe disa ditë më vonë ai është gjetur i vrarë me një plumb në kokë vetëm pak metra në tokën malazeze . Në xhep të xhakestës i janë gjetur dy foto , ajo e nanës tij Predës dhe e mbesës të dashur që donte aq fort, Greta Bardelit (Gjonit). Edhe sot e kësaj dite eshtrat e tij nuk dihet ku janë , por ndoshta dhe diku në tokën malazeze aty ku u shua jeta tij .Dhe gjithë kjo dramë dhe jetë e vëzhguar në çdo çast nga regjimi në fuqi kanë rënë me tërë ashpërsinë e tyre për shumë vite mbi supet e familjess ë madhe dhe fisnike shkodrane të Zef Gjonit. Pikërisht në ato vite të vështira Zefi zgjodhi të mbijetonte dhe t’i bënte sfidë diktaturës duke ju përkushtuar fort sportit. Kështu ai djalosh i vogël , por shtatëlartë, që dikur luante futboll dhe kryente mundje aty tek lagjia e tij , tek fusha e Kishës Madhe , me mikun e vet Paulin Ndoja, shpejt do ndiqte sportin e boksit si dy vëllëzerit e vet Ndoci dhe Ndoja.Trajneri Shyqyri Halili në moshën 15 vjecare në Durrës do ta ngjiste në ring Zef Gjonin në ndeshjen e parë të tij në kampionatin për të rinjë-rritur.
Ai pasi fiton bindshëm me boksierin vlonjat Maliq Banushi do bëhet pjesë e ekipit të parë .Por vetëm një vit në sportin e boksit, sepse në vitin 1963 ky sport me urdhër të Partisë në pushtet nuk do të zhvillohej për rreth 30 vite . Por shtatëlartësia e Zef Gjonit afërsisht tek 2 metrat , si një djalë shalian me tipare fisnike malësore do bënte që trajneri i basketbollit Esat Harxhi ta afrojë tek ekipi i basketbollit të rinjve të Vllaznisë përkrah Muhamet Sokolit, Dhimitër Tashit , Nikolin Palit, Bujar Golemin dhe Ivan Lacej. Shpejt shumë shpejt , kur ishte 17 vjeç në vitin 1971 Zef Gjoni do të kalojë tek ekipi i parë i Vllaznisë që së bashku me Luan Shatkun , Zydi Çobën, Filip Guraziun , Renato Radojën, vëllëzërit Petrit dhe Skënder Osmani, Dhimitër Tashin , Refik Vorfën dhe të drejtuar aq mirë nga Bujar Golemi do të krijonin atë skuadër “ansambël” basketbolli të Vllaznisë që jo vetëm rivalizonte fort Partizanin, Dinamon dhe 17 Nëndorin , por dhe sot kur e kujtoj e thonë me shumë bindje se “ është e vështirë të rikthehet në Shkodër një ekip i tillë”.Në vitin 1981 , kur ishte 34 vjeç , Zef Gjoni për shumë arsye dhe në heshtje të plotë i jep lamtumirën sportit, për t’u rikthyer përsëri pas 10 viteve diku në fillim të vitit 1992 tek dashuria e tij e parë sportive , aty ku gjen më mirë vetveten dhe suksesin e vet , tek boksi dhe ringu. Por ky rikthim i tij këtë rradhë ka qënë si trajner , që plot pasion ka punuar dhe punon fort çdo ditë , sepse siç e thotë dhe vet Zefi :” gjithëçka që është vlerësuar këto vitet e fundit , duke filluar nga “Qytetar Nderi Shkodrës” dhe deri tek “Mjeshtër i Madh”, janë shumë pak përpara asaj që ndien dhe përjeton çdo ditë për sportin e boksit”. Dhe Zef Gjoni, që tani është drejt një 75 vjeçari siç duket ka vendosur t’i bëjë sfidë moshës së vet , duke zgjedhur si motivim përsëri sportin. Por duhet pranuar dhe besuar nga të gjithë , se njerëz të tillë si ky Zef Gjoni kanë treguar se dinë të fitojnë me sukses ndaj çdo sfide .
SKEDA E ZEF GJONI
Lindur: Në Shkodër , më 12 Janar 1947
Karrriera në sport: Në vitet 1961-19063 në boks, 1967-1981 baskeboll “Vllaznia” , në vitet 1992-2021 trajneri i boksit të ekipit “Vllaznisë dhe ekipit kombëtar.
Trofe të fituara: 23 tituj kampion kombëtar dhe 20 Kupa të Shqipërisë , 19 tituj kampion me U-18 dhe 15 tituj kampion me U-15 me ekipet e “Vllaznisë”.
Vlerësime: “Trajner i Merituar “, “Qytetar Nderi i Shkodrës “ dhe Medalja e Presidentit “Mjeshtër i Madh”.