Polemika, gola dhe emocione të shumta në duelin mes Partizanit dhe Flamurtarit në Kategorinë Superiore. Të Kuqtë kanë arritur që të fitojnë 3-1 ndaj vlonjateve, në një ndeshje që do të rezultonte një tjetër shfaqje e shëmtuar në këtë sezon.
Në minutën e 11-të, Asani dha një pasim fantastik në zonë për Bardhin, i cili e kishte të thjeshtë për ta shoqëruar topin në rrjetë. Flamurtari reagoi mjaft mirë duke u hedhur në sulm me aksione të rrezikshme, ndërkohë që Partizani provoi sërish me Asanin. Në minutën e 40-të, Andi Ribaj shënoi golin e barazimit, duke çuar shifrat në 1-1. Futbollistët e skuadrës vlonjate u rreshtuan para fotografit të tyre për të festuar golin në mënyrën e tyre tradicionale kohëve të fundit.
Gjithsesi kjo ka acaruar tifozët e “Të Kuqve”, të cilët kanë kaluar rrethimin dhe janë vërsulur drejt fotografit të cilin e kanë goditur dhe i kanë marrë aparatin fillimisht, të cilin ja kthyen vetëm pasi ndërhynë forcat e sigurisë. Ky moment nuk ka kaluar pa pasoja për Flamurtarin, pasi gjyqtari kryesor ka ndëshkuar me karton të kuq Ribajn, për shkak të tensionit që ka krijuar duke provokuar tifozët e Partizanit, sipas sinjalizimit të gjyqtarit të katërt.
Në pjesën e dytë, skuadra e Gegës u rikthye sërish në avantazh me Hebajn. Bardhi tentoi me një goditje të fortë në hyrje të zonës që ndalet nga Koliçi dhe më pas shkon në këmbët e sulmuesit, që e ka të thjeshtë me portën e boshatisur. Hebaj do të bëhej sërish protagonist në minutën e 72-të, pasi shfrytëzoi më së miri një tjetër asist të Asanit duke realizuar golin e dytë personal. Partiani me këtë fitore ruan kreun e renditjes me 49 pikë, 10 më shumë se Teuta, që ka dhe një sfidë më shumë për të luajtur.
