Një botë ku ADN mund të rishkruhet për të shëruar sëmundje vdekjeprurëse mund të bëhet realitet më shpejtë nga sa mendohej. Një grup shkencëtarësh kinezë, amerikanë dhe britanikë njoftuan se për herë të parë kanë arritur të modifikojnë gjenetikisht qelizat njerëzore. Pacienti i parë që i është nënshtruar kësaj teknike është një kinez. Atij iu injektuan qeliza imune të korrigjuara për të luftuar kancerin në mushkëri. Rezultatet e para, thonë shkencëtarët, janë mbresëlënëse, por sërish ata shmangin euforinë dhe thonë se të tjera testime janë të nevojshme. Teknika e përdorur është ajo që në mjekësi njihet si “CRISPR” ose e quajtur ndryshe si “gërshëra molekulare”. Këto “gërshërë” shkëpusin nga molekulat kodin gjenetik difektoz dhe e zëvendësojnë atë me instruksione të reja për të ndërtuar qeliza të shëndetshme.
