Më 6 dhjetor kur në Tiranë nga njëra anë do të jenë liderët e Bashkimit Europian dhe në anën tjetër opozita e Sali Berishës në shesh duke protestuar, Gjykata e Apelit do të vendosë për ankimin e Alibeajt, i cili ka kërkuar që vendimet e kuvendeve të 17 korrikut dhe 18 dhjetorit të regjistrohen bashkë.
Kjo është data e radhës për shqyrtimin e kësaj çështje në Gjykatën e Apelit, pas dy shtyrjeve të para. Shkaku i shtyrjes në dy herët e para qenë mosparaqitja në seancë e avokatit Indrit Sefa.
Shqyrtimi i kësaj çështjeje në Gjykatën e Apelit edhe në rast vendimmarrje nuk do të zgjidhte asgjë në mënyrë përfundimtare sa i takon statutit të Partisë Demokratike që njihet ligjërisht.
Në rastin më të mirë për palën e Enkelejd Alibeajt, nëse gjykata do e pranojë kërkesën, atëherë çështja do të rikthehej në shkallën e parë të gjyqësorit. Në këtë shkallë ka edhe një vendim dhënë nga gjyqtari, Agron Zhukri që ka njohur vendimet e dala nga Kuvendi që thirri Sali Berisha më 11 dhjetor 2021.
Por edhe vendimi i Zhukrit është apeluar nga Alibeaj që kërkon rrëzimin e tij. Për këtë çështje ende nuk ka një datë shqyrtimi nga Gjykata e Apelit. Nëse Apeli do të pranonte kërkesën e Alibeajt, do i hapej rruga e mbetjes në fuqi të vendimeve që kanë dalë nga kuvendi i 18 dhjetorit.
Por nëse Gjykata rrëzon ankimin e Enkelejd Alibeajt, atëherë për Berishën do të lindte e drejta për ta regjistruar statutin e 11 dhjetorit në regjistrin kombëtar të partive, duke mbajtur në mënyrë definitive vulën dhe firmën e PD-së edhe zyrtarisht.
