Shqipëria pro, Azerbajxhani del kundër zgjatjes së mandatit të përfaqësuesit të OSBE-së për Lirinë e Medias, Harlem Désir

107

Azerbajxhani, sipas një raporti të cilit i referohet prestigjiozja “Der Standard”, është kundër zgjatjes së mandatit të Përfaqësuesit të OSBE-së për Lirinë e Mediave, Harlem Désir, i cili, sipas planeve të Kryesisë shqiptare të OSBE-së, do të mbetet në detyrë së bashku me tre drejtuesit e tjerë të organizatës. Pa miratimin e 57 vendeve anëtare të OSBE-së, organizata do të përballet me një ndërhyrje nga 18 korriku. “Ministria e Punëve të Jashtme në Azerbajxhan në shenjë proteste tha pranë Këshillit të Përhershëm të Organizatës për Siguri dhe Bashkëpunim në Evropë (OSBE) se nuk ishte dakord me riemërimin e diplomatit francez, Harlem Désir si përfaqësues për mediat i OSBE-së edhe për tre vite të tjera”, raportoi të mërkurën agjensia e pavarur e lajmeve Azerbajxhan Turan, e themeluar në 1990, shkruan Derstandard. Ministria e Punëve të Jashtme e mbështeti qëndrimin e saj në faktin se Deziri “kritikoi së tepërmi” situatën me lirinë e shprehjes në Azerbajxhan, gjatë mandatit të tij të parë tre-vjeçar. Sipas Turan, Baku po bllokon edhe zgjatjen e mandateve të Sekretarit të Përgjithshëm të OSBE-së, Thomas Greminger, mandat që i skadon në korrik, Ingibjörg Solrun Gisladottir si Drejtor i Zyrës për Institucionet Demokratike dhe të Drejtat e Njeriut (ODIHR) dhe Lamberto Zannier si Komisioner i Lartë për Pakicat. Këto vendime të rëndësishme të personelit në OSBE duhet të merren me konsensus me të gjitha vendet anëtare të OSBE-së. Zëdhënësi i kryesisë shqiptare të OSBE-së nuk ka dhënë asnjë sqarim në lidhje me pozicionin e Bakut. Sidoqoftë, ai konfirmon se Shqipëria po kërkon të zgjasë mandatet për katër emrat e mësipërm. “Më shumë se 90 përqind e vendeve anëtare të OSBE-së pajtohen me qasjen tonë. Sidoqoftë, negociatat janë ende në vazhdim e sipër, kështu që ne nuk mund të themi asgjë në lidhje me rezultatin e tyre dhe kohën e vendimeve të mëtejshme,” tha diplomati shqiptar, Andris Stastoli. “Austria mbështet kryesinë shqiptare të OSBE-së në shtrirjen e konsensusit në mënyrë që të sigurojë funksionimin e qetë dhe efikas të organizatës në një kohë që është sfiduese për multilateralizmin,” tha një zëdhënës i Ministrisë së Punëve të Jashtme Austriake të premten, por nuk ka dashur të komentojë qëndrimin e Azerbajxhanit.