Prokurori italian Nicola Gratteri jep alarmin: Mafia shqiptare do jetë mafia e të ardhmes

534
Sigal

Prokurori italian, Nicola Gratteri, prej vitit 2016 është në krye të Departamentit të Antimafias italiane të Katanzaros në rajonin e Kalabrisë. Prej vitit 1989, ai është nën mbrojtjen e shtetit dhe në linjën e parë të luftës kundër mafias kalabreze Ndrangheta. kreu i antimafias kalabreze shprehet se tashmë edhe mafia shqiptare renditet tek ato më të fuqishmet. Nicola Gratteri: “Mafia shqiptare është një mafia gjithnjë e në zhvillim në Evropë dhe do të jetë mafia e së ardhmes. Mafia shqiptare po shtrihet gjithnjë e më shumë në Amerikën e Jugut. Në bashkëpunim me mafian kalabreze Ndrangheta është e aftë të importojë sasi të mëdha kokaine në Evropë. Mafia shqiptare është gjithashtu mjaft e pranishme në prodhimin e marijuanës dhe tonelata marijuanë të trafikuara nga Shqipëria po pushtojnë Evropën. E ne jemi shumë të shqetësuar”. Prokurori i Antimafias italiane shpreh shqetësimin e tij dhe për sistemin e drejtësisë në Shqipëri. Nicola Gratteri: “Ajo ka vëmë re është se për fat të keq sistemi gjyqësor në Shqipëri dhe lufta e policisë shqiptare në këtë drejtim është pak e butë. Ka shumë për të bërë në këtë drejtim. Shikojmë një sistem drejtësie mjaft të ngadaltë e jo në të njëjtin dimension me aktivitetin kriminal që ekziston në Shqipëri”. Por a investon mafia shqiptare në Itali? Nicola Gratteri: “Është e dukshme se mafiet e huaja në Itali që shesin drogë në Evropë, investojnë paratë e tyre e përfitimet nga aktiviteti kriminal në Evropë dhe mafia shqiptare nuk bën përjashtim. Ne mendojmë se mafia shqiptare po investon dhe po blen në Evropë. Prokurori italian shton se ka të dhëna që pjesëtarë të Ndraghetës strehohen në Shqipëri. Nicola Gratteri: “Po ka ndranghetistë që fshihen në Shqipëri. Shkojnë në Shqipëri për aferat e tyre kriminale e rrinë të qetë sepse është më e lehtë për t’u fshehur në Shqipëri si persona në kërkim sesa në Itali”.