Presidenti Ilir Meta ka reaguar ashpër ndaj ndërhyrjes së një pjese të diplomatëve në zbatimin e ligjit në Shqipëri. Në një intervistë për emisionin “Open” në “Top Channel”, Meta u është përgjigjur dhe kritikave që me qëndrimet e tij po ndihmon opozitën. Presidenti tha se qëndrimi i tij ka lidhje vetëm me zbatimin e Kushtetutës.
“Ju doni që unë të marr rolin e liderit të opozitës, por unë s’kam lidhje me ta. Unë ju garantoj se do jem lideri i sovranitetit te shtetit shqiptar”,- tha Presidenti.
Duke denoncuar ndërhyrjet për Gjykatën Kushtetuese, Presidentit tha se kjo gjykatë është vija e kuqe që nuk do ta lejojë të takohet. “E kam thënë dhe e përsërisë tek Gjykata Kushtetuese vija është e kuqe dhe është e kuqe flake. Ju garantoj se ajo vije nuk do kalohet. Le ta provojnë dhe do ta shohim. Gjykata Kushtetuese do mbrohet, kjo nuk diskutohet. E përsërisë, le ta provojnë dhe ta shohim!”,- tha Meta.
Lidhur me ndërhyrjet e një pjese të ambasadorëve, Presidenti tha: “Do jem i qartë për çdo vagabond diplomat qe justifikon shkeljet e Kushtetutës dhe të ligjit. Askush nuk mund ta vërë në diskutim autoritetin e Presidentit të Republikës. Tek Gjykata Kushtetuese unë nuk bej shaka”,- tha Presidenti.
Ndër të tjera Meta u shpreh për ambasadorin e Bashkimit Evropian në Shqipëri, Luigi Soreca- n se është përgjegjës për situatën në Kushtetuese. “Nuk kam nevojë të më përkrahë Soreca”, u shpreh presidenti i vendit. Më tej shtoi: “Ambasadorët të heqin dorë nga lobimet, po dëmtojnë vendet e tyre. Këta ambasadorë po dëmtojnë Edi Ramën dhe Shqipërinë. Ata i kanë krijuar Ramës idenë se mund të bëjë gjithçka. Një fjalë nuk thanë ambasadorët që duhen zgjedhje lokale gjithëpërfshirëse. Ka patur një lobing të fortë për t’i dhënë të gjithë drejtësinë Edi Ramës”.
