Kreu i PD-së, Lulzim Basha ka reaguar sërish për sulmet e kryeministrit Edi Rama ndaj opozitës dhe refuzimin për të zbatuar planin e shpëtimit për ekonominë.
Basha u shpreh se qeveria ka përgjegjësi për jetën e qytetarëve dhe duhet të përdor çdo burim ekonomik në funksion të përballimit të kësaj situate.
Në një video të publikuar në Facebook, Basha ka shpjeguar dhe planin që ka paraqitur opozita për të ndihmuar bizneset dhe mjekësinë për përballimin e sitës.
Mesazhi i plotë i kreut të PD-së, Lulzim Basha:
Çdo masë e propozuar nga opozita është realiste. Qeveria të lërë luftën politike dhe t’i zbatojë! Sulmet nuk ofrojnë asnjë zgjidhje.
Çdo vend ka marrë masa financiare dhe fiskale për përballimin e krizës. Prej një jave edhe ne kemi propozuar masa lehtësuese që u vijnë në ndihmë familjeve në nevojë, sipërmarrësve të vegjël dhe punëtorëve.
Detyra e parë e qeverisë duhet të jetë shëndeti i shqiptarëve dhe po kështu, ndihma për qytetarët dhe për ekonominë. Shëndeti, siguria dhe ekonomia e njerëzve, janë shqetësimi ynë.
Është e papërgjegjshme dhe jo njerëzore të sulmosh ditë e natë opozitën, në një kohë kur të gjitha energjitë duhen fokusuar për tu ardhur në ndihmë njerëzve.
Çdo masë që kemi propozuar është realiste dhe e zbatueshme nëse ka MIRËMENAXHIM, KOMPETENCË dhe TRANSPARENCË.
120 milionë euro që shkojnë dëm me koncesionet e oligarkëve, duhet të angazhohen URGJENTISHT për mbështetje sociale, për fonde shtesë për shëndetësinë si dhe për mbështetje fiskale dhe financiare për bizneset që sot kanë mbyllur dyert.
Jeta nuk ka çmim, sulmet bajate kundër opozitës nuk ofrojnë asnjë zgjidhje. Me batuta nuk qeveriset vendi, nuk ushqehen njerëz, nuk shpëtohen biznese dhe nuk rimëkëmbet ekonomia.
Ndaj do të vazhdoj pa u lodhur ti bëj thirrje qeverisë, që për hir të të gjithë shqiptarëve, të lërë mënjanë luftën politike, dhe të vërë interesat e njerëzve të parat. Ndiqni më poshtë masat me efekt të menjëhershëm që i bëj thirrje qeverisë ti zbatojë pa humbur më kohë.
