Basha optimist pas takimit me aleatët: Nesër pjesëmarrje rekord, do jem me familjen time

372
Kryetari i Partisë Demokratike Lulzim Basha ka dalë optimist nga takimi me aleatët parlamentarë në selinë e PD-së. Ai tha se nga informacionet e deri tanishme, mësohet se do të ketë një pjesëmarrje gjigande, rekord në protestën e nesërme të opozitës.
Ai tha se protesta do t’i shërbejë shpalljes së një marrëdhënie të re, ndryshe nga ajo 6 muaj më parë midis pushtetit dhe qytetarëve.
“Kemi rakorduar me aleatët parlamentarë të gjitha detajet për ditën e nesërme sa i takon organizimit politik. Jemi në përditësim të lajmeve nga të gjitha anët e vendit që flasin për një pjesëmarrje gjigande rekord në protestën e nesërme. Sot ka një marrëdhënie të re të ndryshme nga 6 muaj më parë midis pushtetit dhe qytetarëve. Shumica e qytetarëve nuk kanë dyshim se shteti është i kapur nga banditët. Kjo është arsyeja përse nesër në sheshin e protestës do të derdhen me qindra mijëra qytetarë, demokratë, socialistë e të bindjeve të ndryshme në një protestë të madhe popullore, e cila do të shpallë këtë marrëdhënie të re”, deklaroi kreu i PD-së.
Basha theksoi se do të jetë në protestë me familjen e tij dhe se nuk do të ketë luftë por do të jetë një protestë paqësore.

“Ne të gjithë do të jemi në protestë nesër. Unë do të jem me familjen time. Nuk do të jetë luftë. Shumica e shqiptarëve nuk do të pranojnë më banditë në qeveri, banditët e kanë vendin në burg. Ndaj ejani të gjithë, mos rrini gojëkyçur në shtëpi duke mallkuar. Nesër është dita e bashkimit të madh të shqiptarëve. Nesër është dita e bashkimit te një shumice ndaj pakicës, e cila nuk ka rrugë tjetër veç të largohet e t’i hapë rrugë qeverisë anti-mafia”, apeloi Basha.