VOA/ Ish zyrtari i lartë i FBI-së dhe kreu i mbrojtjes kibernetike McGonigal pranon fajsinë për shkelje të sanksioneve amerikane dhe marrjen e miliona USD, prona dhe pasuri në këmbim të luftës së brendshme politike edhe në Shqipëri. Lidhja me zyrtarët shqiptar, roli i Hunter Biden dhe hetimet e SPAK
Çështja McGonigal, tabloidi britanik: I implikuar është edhe djali i Presidentit Biden
Çështja McGonigal duket se do të vijojë të jetë ende në qendër të mediave botërore. Të mërkurën gazeta britanike ‘Daily Mail’ tha se ish-agjenti i lartë i FBI, Charles McGonigal, ka pranuar fajin për një nga dy dosjet e hapura ndaj tij duke rrezikuar deri në pesë vite burg pasi pranoi fajin se ka punuar në mënyrë të paligjshme për një oligark rus. Por në shkrimin e saj ‘DailyMail’ raporton se McGonigal është nën hetim për një tjetër çështje, e njohur si çështja shqiptare dhe sipas gazetës në këtë çështje është i implikuar edhe djali i presidentit amerikan, Hunter Biden. Bëhet fjalë për implikimin e Hunter Biden përmes Dorian Duçkës, këshilltarit në hije të kryeministrit Edi Rama.“McGonigal akuzohet veçmas në gjykatën federale të Uashingtonit për fshehjen e të paktën 225 mijë dollarëve para të thata që dyshohet se i ka marrë nga një ish-zyrtar i inteligjencës shqiptare, ndërsa punonte për FBI-në. Ky rast përfshin disa çështje që mund të kenë lidhje me Hunter Biden, djalin e presidentit, i cili tani është subjekt i një hetimi të posaçëm. Zyrtari është identifikuar në raportet e shtypit si Agron Neza, i cili e prezantoi McGonigal me shqiptarin Dorian Duçka, i cili punonte për konglomeratin kinez të energjisë CEFC, tani të shpërbërë. Një email nga laptopi famëkeq i Hunter, i referohej dikujt me të njëjtin emër. “Doriani ka qenë një ndihmë e vërtetë që herët, kështu që ne duhet ta shqyrtojmë mundësinë se si ta përfshijmë atë,”- shkruante bashkëpunëtori i Hunter, James Gilliar në një email të vitit 2017 për një marrëveshje. “Nuk ka se si të mos e bëjmë,” përgigjet Hunter, duke shtuar: “Edhe nëse shumica thotë jo, unë do të heq nga paga ime”. McGonigal ishte agjent special i ngarkuar me divizionin e kundërzbulimit të FBI-së në Nju Jork nga viti 2016 deri në vitin 2018,” – shkruajti kështu ndër të tjera tabloidi britanik ‘DailyMail’
McGonigal pranon fajësinë për shkelje të sanksioneve amerikane. Aktpadia në Uashington ka lidhje me Shqipërinë
Ish-zyrtar i lartë i kundërzbulimit të FBI-së, Charles McGonigal pranoi fajësinë të martën lidhur me akuzën për shkelje të sanksioneve amerikane ndaj Rusisë, duke punuar pas daljes në pension, për një oligark rus të cilin më parë ai e kishte hetuar. Charles McGonigal, 55 vjeç, tha para një gjykate federale në qytetin e Nju Jorkut se ishte “thellësisht i penduar” për punën që bëri në vitin 2021 për industrialistin miliarder rus Oleg Deripaska. Zoti McGonigal tha në gjykatë se mori mbi 17,000 dollarë nga Deripaska për ta ndihmuar atë që të mblidhte informacione negative për një tjetër oligark rus, i cili ishte konkurrent biznesi. Shtetet e Bashkuara kanë vënë sanksione ndaj oligarkut Deripaska, që nga viti 2018, për arësye që lidhen me pushtimin e Krimesë nga Rusia. Ish-agjenti McGonigal po përpiqej gjithashtu ta ndihmonte Deripaskën që të hiqej nga lista e sanksioneve, tha Ndihmësprokurorja federale Rebeça Dell dhe po ashtu kishte hyrë në negociata, së bashku me disa bashkëpunëtorë, për një shpërblim prej 650,000 deri në 3 milionë dollarë, në shkëmbim të kërkimit për dokumente elektronike, që mund të zbulonin rreth 500 milionë dollarë në pasuri, të fshehura nga rivali i tij në biznes. Zoti McGonigal pranoi fajin për një akuzë të vetme dhe mund të përballet me pesë vite burg. Dënimi i tij do të shpallet në një seancë gjyqësore më 14 dhjetor. Ish-agjenti McGonigal, i cili jeton në Nju Jork, është akuzuar veçmas në një gjykatë federale në Uashington, për fshehjen e të paktën 225,000 dollarëve, që dyshohet se i ka marrë nga një ish-zyrtar i zbulimit shqiptar, ndërsa punonte ende për FBI-në. Charles McGonigal ishte agjent special në divizionin e kundërzbulimit të FBI-së në Nju Jork nga viti 2016 deri në vitin 2018. Ai mbikqyrte hetimet e oligarkëve rusë, përfshirë Deripaska-n. Gjykata e Uashingtonit i ka konfirmuar sanksionet kundër oligarkut Deripaska, duke nënvizuar provat se ai kishte vepruar si agjent i presidentit rus Vladimir Putin. Zoti McGonigal tha se pagesa e Deripaskës për të, prej 17,500 dollarësh u krye nga një bankë në Qipro. Paratë u transferuan tek një kompani në Nju Xhersi, përpara se të depozitoheshin në llogarinë e tij bankare. Firma në Nju Xhersi, sipas aktpadive, i takonte shqiptaro-amerikanit, që i kishte dhënë ish-agjentit McGonigal, 225,000 dollarët, pjesë e aktapadisë tjetër ndaj tij në Uashiongton. “Ky, siç mund ta imagjinoni, ka qenë një proces i dhimbshëm jo vetëm për mua, por për miqtë, familjen dhe të dashurit e mi. Marr përgjegjësinë e plotë, pasi veprimet e mia nuk kishin për qëllim kurrë që të dëmtonin Shtetet e Bashkuara, FBI-në, familjen dhe miqtë e mi”, tha zoti McGonigal.
Zyrtari i lartë i sigurisë kombëtare në Departamentin e Drejtësisë, Mattheë G. Olsen, tha se “McGonigal e pranoi vetë se tradhtoi betimin dhe fshehu në mënyrë aktive punën e tij të paligjshme në shërbim të një oligarku rus nën sanksione”. “Pranimi i fajit tregon vendosmërinë e Departamentit të Drejtësisë për të ndjekur dhe çmontuar rrjetet e paligjshme që përdorin oligarkët rusë për t’iu shmangur sanksioneve dhe ligjeve tona”, tha Ndihmësprokurori i përgjithshëm Mattheë Olsen, i cili drejton Drejtorinë e Sigurisë Kombëtare në Departamentin amerikan të Drejtësisë. / voa
