Shtëpia Botuese “Argeta LMG” ka sjellë pranë lexuesit një përmbledhje në prozë nga autorja amerikane Kejt Shopen (Kate Chopin), shqipëruar nga Manjola Nasi. Në të përfshihet romani i famshëm “Zgjimi”, i cili, në kohën kur u botua, krijoi një valë reagimesh të lexuesve e kritikëve që e cilësuan si skandaloz dhe të pamoralshëm, gjë që solli ndalimin e tij dhe për shumë kohë i hoqi mundësinë e një vlerësimi të kujdesshëm objektiv si dhe një grusht tregimesh të zgjedhura. Në ditët e sotme, Kejt Shopeni shihet shpesh si pararendëse e letërsisë feministe, pasi ajo u kushtoi vëmendje të veçantë kushteve në të cilat jetonin femrat, cenimet, kufizimet me të cilat ato përballeshin dhe vështirësinë e tyre për të qenë të lumtura e për të arritur të shprehin natyrën e tyre të vërtetë. Shopeni bën pjesë te të parët shkrimtarë që sollën në letërsinë amerikane tematikën e seksualitetit femëror, pa vënë në qendër, sado që pa lënë mënjanë, dilemat morale të grave si pjesë e strukturave shoqërore. Në romanin “Zgjimi”, Edna Pontelie, një grua e martuar dhe nënë e dy fëmijëve, fillon ta perceptojë veten si një qenie të mëvetësishme, jeta e së cilës po e humb kuptimin duke u vënë tërësisht në funksion të jetës së të tjerëve. Dalëngadalë ajo fillon të bëjë zgjedhje që e shkëpusin nga roli si bashkëshorte dhe si nënë dhe fillon të jetojë për veten e saj. Përkthyesja Manjola Nasi, njëkohësit pedagoge e gjuhës angleze në Fakultetin e Gjuhëve të Huaja të Universitetit të Tiranës, shprehet se megjithatë, vepra e Shopenit në përgjithësi dhe “Zgjimi” në veçanti, nuk duhen parë si letërsi e mirëfilltë aktivizmi në fushën e të drejtave të grave. Synimi i saj i vërtetë, nuk duket të ketë qenë nisja e një revolucioni, por paraqitja e të vërtetës, pa u ndrydhur nga normat e kohës dhe pa marrë parasysh se sa e hidhur dhe e papranueshme mund të ishte kjo e vërtetë për ata lexues që ishin mësuar me konceptin e gruas si qenie shoqërore, jo si individ në të drejtën e vet për të jetuar. Znj. Nasi vlerëson se është në të mirë të veprës fakti që tashmë këto tema nuk kanë më atë efekt tronditës te lexuesi, pasi kështu, ky i fundit mund të përqendrohet më mirë te vlerat e saj të tjera estetike, mes të cilave spikat në mënyrë të veçantë ndërtimi i personazheve, depërtimi i thellë në psikologjinë e tyre, analiza e kujdesshme e përballjes së tyre të vështirë me veten dhe me të tjerët, si dhe tipizimi i gjuhës, loja me simbolet e shumë elemente të tjera, që e bëjnë veprën e Shopenit të zërë vend në panteonin e arritjeve të letërsisë amerikane. Përveç se te “Zgjimi”, në këtë përmbledhje që i ofrohet lexuesit shqiptar, këto vlera bëhen edhe më të qarta tek tregimet e përzgjedhura me kujdes për tematikën dhe forcën e tyre artistike. Për këtë, kjo vepër, shqipërimi i së cilës u mbështet nga Fondi për Përkthim i Ministrisë së Kulturës, është një pasuri letrare në duart e lexuesit.
