Rrahu adoleshtentin se shkeli karantinën tek Liqeni, polici dënohet me punë publike

88
Sigal

Gjykata e Tiranës ka dënuar me 4 muaj burg policin Glen Ndreu, i cili dhunoi adoleshentin Sarandi Çobo në zonën e liqenit Artificial një vit më parë.

Dënimi për Ndreun do të kalojë në punë në interes publik. Video e dhunës në maj të 2020-ës bëri xhiron e rrjetit, ndërsa Drejtoria e Standardeve pezulloi efektivin e Komisariatit nr 2, i cili u kallëzua edhe për dhunë.

Gjatë procesit penal të zhvilluar në Gjykatën e Tiranës, nëna e të riut të dhunuar kërkoi dënim maksimal për efektivin, i cili dhunoi adoleshentin pasi ndodhej jashtë gjatë karantinës së vendosur për masat anticovid dhe nuk respektuan sipas policisë urdhrat e Policisë.

Nëna e adoleshentit paralajmëroi ankim të vendimit të Shkallës së Parë pasi nuk ishte dakord me kalimin në punë në interes publik të 4 muajve burg.

Kujtojmë se skandali i dhunimit të adoleshentit u pasua edhe nga një deklaratë e Drejtorit të Përgjithshëm të Policisë së Shtetit Ardi Veliu, i cili teksa publikonte video nga instagrami i nënës së të riut gjatë një skene filmi, e akuzonte atë se mbante armë, duke justifikuar veprimet e policëve me faktin se i riu nuk ishte rritur në mënyrën e duhur.