Këto janë pamjet e grabitjes së argjendarisë në Kamëz të shtunën e kaluar, ku dy persona, që siç duken në pamje kanë qenë të armatosur me Kallashnikov dhe çekiç, kanë thyer çdo gjë dhe kanë grabitur sendet me vlerë.
Një argjendari në Kamëz u grabit të shtunën nga dy persona të maskuar, njëri prej të cilëve ishte i armatosur me armë zjarri.
Ngjarja ndodhi rreth orës 13:00, kur autorët hynë në argjendarinë në pronësi të shtetasit O.L. dhe morën një sasi bizhuterish me vlerë. Më pas ata u larguan me motor.
Nga hetimet paraprake rezulton se grabitësit lëvizën drejt zonës së Zall Herrit. Kamerat e sigurisë kanë filmuar itinerarin e tyre, ndërsa në një moment autorët janë rrëzuar me motor, por kanë arritur të largohen sërish.
Vlera e bizhuterive të vjedhura arrin rreth 700 mijë lekë.
Policia ka shoqëruar disa persona me precedentë penalë për verifikime, por deri tani autorët nuk janë identifikuar.
