Kërkesë Publike drejtuar:
Zotit Edi RAMA, Kryetar i PS dhe Kryeministër i Qeverisë
Zotit Ilir META, Kryetar i LSI dhe Kryetar i Kuvendit të Shqipërisë
Zotit Lulëzim BASHA, Kryetari i PD dhe kryetar i Opozitës
Gjithë kryetarëve të forcave të tjera politike të përfaqësuar në Kuvendin e Shqipërisë.
Zotëri të nderuar!
Shqipëria në 1991 doli nga një sistem diktature që karakterizohej nga censura e mendimit politik, por sot në 2015, në Kuvendin e Shqipërisë dhe nga të gjithë ndërkombëtarët pranohet si domosdoshmëri dekriminalizimi i shtetit, një fenomen që i është mbishtuar shoqërisë shqiptare në këto 24 vjet pluralizëm. Të gjitha deklarimet për de-kriminalizim të Shtetit, ndëshkimin e korrupsionit dhe vendosjen e shtetit ligjor, nuk do të jenë të suksesshme dhe do të përfundojnë në humbje kohe nëse ju do vazhdoni të anashkaloni zgjidhjen e problemit të pronës dhe do të vazhdoni të insistoni në zgjidhjen nëpërmjet kompensimit. Platforma aktuale është e dështuar dhe bie ndesh me Kushtetutën. Për zgjidhjen e problemit të pronës, sugjerojmë ti referoheni reflektimit në vitin 2013 të z. Sali Berisha, politikanit, që me protagonizmin e tij anti-pronar për 23 vjet, solli këtë anarki mbarëkombëtare të titujve të pronësisë, që kultivoi korrupsion jo vetëm në institucionet e administratës shtetërore që merren me pronat por edhe në gjyqësor dhe sektorë të tjerë. Zgjidhjen e jep zbatimi i Kushtetutës, zbatimin e të cilës ju duhet ta deklaroni si detyrim të Shtetit. Tani në prag të zgjedhjeve për pushtetin vendor, Kryesia e Shoqatës “Krahina Jonë Dukat-Tragjas-Radhimë”, në mbledhje e saj të fundit, vendosi t’i orientojë zgjedhësit që në votimet e 21 Qershorit, të votojë vetëm ata kandidatë , për të cilat forca politike mbështetëse do të shprehet në mënyrë institucionale se ka vullnet politik për të zbatuar detyrimet kushtetuese që rrjedhin nga nenet 4,15,17, 41/2, 122/2 dhe 181 të Kushtetutës në fuqi dhe Vendimit Pilot të GJEDNJ. Këto detyrime për mungesë të vullneti politik të drejtuesve të PD, LSI dhe PS, faktikisht deri tani nuk kanë gjetur zbatim. Zgjidhja është kthimi dhe jo kompensimi. Kjo është sqaruar me shifrat e referuara nga Drejtoresha e AKKP znj. Sonila Qato. Vendimet dhe ligjet e miratuara deri sot për pronat, shtyjnë afatet kohore, justifikojnë të keqen dhe bien ndesh me detyrimet e shtetit për të respektuar të drejtën tonë që secili të gëzojë normalisht pronën e tij të trashëguar. Këto gabime, që përbëjnë krim kombëtar riciklohen në Kuvendin e Shqipërisë, ku prej vitit 1991 e deri sot vazhdon të mbahet si pikë reference neni 8 i ligjit 7501 dhe jo detyrimet kushtetuese , që vazhdojnë të shkelen. Propozimet që ne kemi ofruar për zgjidhjen e drejtë dhe pa faturë financiare, prej shumë kohe vazhdojnë të bien në vesh të shurdhër. Ne shpresojmë që ju nuk do ta anashkaloni këtë kërkesë dhe do të jepni përgjigjen tuaj institucionale në shtyp, nëse do vijoni ta mbani peng kthimin fizik të pronës, në zonat turistike apo jeni dakord për zgjidhjen konform Kushtetutës, në mënyrë që edhe votuesit të jenë të sqaruar nëpërmjet jush për këtë problem themelor të demokracisë dhe të Shtetit Shqiptar.
Për Kryesinë e Shoqatës
“Krahina Jonë Dukat-Tragjas-Radhimë“
Kryetari Av. Axhem Ymeri
