Policia spanjolle në bashkëpunim me autoritetet holandeze dhe belge, kanë goditur një rrjet të trafikut të drogës dhe kanë sekuestruar 2 ton marijuanë. 19 persona janë vënë në pranga, mes të cilëve shqiptarë, të cilët mbanin pozicione kryesore në organizatën kriminale.
14 prej personave u arrestuan në Spanjë, 4 në Holandë dhe 1 në Belgjikë. Në operacionin e shtrirë në tre shtete morën pjesë 300 agjentë, u bastisën 63 banesa dhe objekte në Spanjë, ndërsa u zbuluan 34,000 bimë kanabis, 14 automjete, 20,000 euro dhe një pistoletë.
Organizata kriminale drejtohej nga holandezë të mbështetur nga shqiptarët, të cilët ishin përgjegjës për gjithçka që lidhej me kultivimin e marijuanës, si dhe nga disa spanjollë që ishin të ngarkuar me logjistikën.
Banda përdorte pasaporta italiane, greke dhe sllovene dhe dokumente identiteti, të gjitha të falsifikuara, për ta bërë të vështirë identifikimin.
