Votuesit zviceranë, në një referendum këtë dielën pritet të vendosin nëse kompanitë do të mbahen përgjegjëse për shkeljet e të drejtave të njeriut dhe kërcënimet mjedisore të kryera nga filialet e tyre, furnizuesit ose nënkontraktorët jashtë vendit.
Referendumi u nis nga Nisma e Përgjegjshme e Biznesit, e mbështetur nga organizatat botërore për mbrojtjen e të drejtave të njeriut dhe mjedisit, Greenpeace dhe Amnesty International.
Zvicra është shtëpia e shumë korporatave globale, duke përfshirë Nestle, gjigandin e minierave Glencore dhe prodhuesin e pesticideve Syngenta.
Çështja ndau vendin përpara referendumit të së dielës dhe mund të ketë pasoja të mëdha për kompanitë shumëkombëshe.
Para referendumit, bankat zvicerane dhe ndërmarrjet e tjera të fuqishme botuan reklama të shtrenjta në gazeta duke paralajmëruar pasojat e rënda të kësaj nisme në ekonomi.
Qeveria zvicerane gjithashtu kundërshton masën dhe mbështet një alternativë të holluar sepse beson se politika e re do të krijonte pasiguri ligjore dhe do të rrezikonte vendet e punës në Zvicër.
Kompanitë zvicerane duhet, sipas iniciativës, t’i kushtojnë vëmendje situatës së të drejtave të njeriut dhe qëndrimit ndaj mjedisit jo vetëm në biznesin e tyre, por edhe përmes biznesit të degëve, furnizuesve dhe partnerëve të biznesit dhe të sigurojnë që gjithçka të jetë në përputhje me standardet ndërkombëtare.
Si shembull, thuhet se fëmijët në kushte të rrezikshme punojnë në minierat e bakrit dhe kobaltit të gjigandit Glencore në Republikën Demokratike të Kongos.
“Ne blejmë produkte qumështi nga 200,000 furnitorë në të gjithë botën çdo ditë. Nëse kjo pranohet, ne do të ishim përgjegjës për 200,000 kompani,” paralajmëroi CEO i Nestle, Mark Schneider.
“Sigurisht që ne duam të monitorojmë zinxhirët tanë të furnizimit dhe ne tashmë po e bëjmë atë intensivisht. Por tashmë në shembullin e qumështit, dhe ky nuk është më problematiku, ju mund të shihni se sa joreale është të sigurohet pajtueshmëri 100% në botë, shpesh në mjedise shumë të vështira”, tha Schneider.
