Policia norvegjeze zbuloi të hënën se kishte arrestuar katër rusë me dyshimin se kishin fotografuar ilegalisht objekte të klasifikuara javën e kaluar, disa ditë para se të kapnin dy rusë të tjerë që dyshohet se kishin dronë.
Norvegjia ka rritur sigurinë në javët e fundit pas një sërë raportimesh për dronë pranë infrastrukturës së saj të naftës dhe gazit dhe në përgjigje të rrjedhjeve të 26 shtatorit në tubacionet e gazit Nord Stream.
“Ne po shohim pasojat e situatës së re të sigurisë në Norvegji”, tha në një konferencë shtypi ministrja e Drejtësisë, Emilie Enger Mehl.
“Ne nuk mund të përjashtojmë raste të tjera.”
Policia tha javën e kaluar se kishte arrestuar një burrë ruso-izraelit në pikën e kontrollit kufitar me dronë në makinën e tij, dhe një tjetër rus duke fluturuar një dron në një aeroport në qytetin arktik të Tromsoe të premten.
Një deklaratë nga policia e qarkut Nordland të hënën zbuloi arrestimet e 3 burrave dhe një gruaje më 11 tetor, shkruan Reuters.
Në deklaratë thuhej se materialet fotografike ishin sekuestruara nga makina e tyre, por nuk u gjetën drone.
Një gjykatë më 14 tetor i dha policisë lejen për të mbajtur katër të dyshuarit në paraburgim për një javë.
