Sipërmarrjet prodhuese në vend kërkojnë nga qeveria zbatimin e 10 masave anti-koronavirus në mbështetje të kësaj industrie me qëllim përballimin e krizës.
Paketa e Bashkimit të Prodhuesve, në mbështetje të sektorit, propozon si masë lehtësuese, subvencionimin nga shteti për 9 javë të 80% të pagës të punonjësve. Prodhuesit shprehen se në paketën e qeverisë, duhet të përfshihen edhe bizneset që kanë reduktim mbi 25 % të xhiros. Sipërmarrja prodhuese kërkon edhe shtyrjen deri në fund të vitit të tarifave dhe taksave vendore, parapagimin e tatimfitimit për 2020, si dhe përgjysmimin e çmimit të energjisë për 3 muaj.
Bashkimi i Prodhuesve Shqiptar shprehet se masat e propozuara mbështesin që punonjësit të mos humbin vendin e punës dhe sigurimin e likuiditetit për përballimin e gjendjes të jashtëzakonshme.
“Përtej vijimit dhe mbështetjes të domosdoshme ndaj kujdesit shëndetësor dhe social për popullatën është mjaft e rëndësishme të merren në konsideratë risqet dhe impakti që epidemia nga njëra anë, por edhe masat kufizuese që po ndërmerren për parandalimin e përhapjes së saj nga ana tjetër, do të kenë në ekonominë e vendit.
Padyshim që kjo situatë e jashtëzakonshme do të shoqërohet me një krizë konsumi në shumë sektorë, por edhe me një krizë likuiditeti për mjaft industri prodhuese, disa prej të cilave u goditën edhe nga pasojat e tërmetit të 26 nëntorit të shkuar.
Kriza e rëndë ekonomike mund të pasohet me probleme të shumta sociale që do të shkaktoheshin nga pamundësia e bizneseve të mbyllura apo që kanë reduktuar në mënyrë të ndjeshme punën, për të paguar pagat apo detyrimet mujore”, thuhet në paketën e propozuar nga Bashkimi i Prodhuesve.
Propozimet për mbështetjen e sipërmarrjes prodhuese:
- Të përfshihen në skemat shtetërore të mbështetjes dhe lehtësirave, të gjithë sipërmarrjet të cilave u është ndaluar aktiviteti apo kanë një reduktim me mbi 25% të xhiros.
- Për sipërmarrjet prodhuese që u është ndaluar aktiviteti të subvencionohen nga shteti, për një periudhë 9 javore, në masën 80% të pagës mujore të punonjësve dhe kontributeve të sigurimeve shoqërore dhe shëndetësore, ndërsa për sipërmarrjet prodhuese që kanë një reduktim me mbi 25% të të ardhurave nga shitja, shteti t’i subvencionojë, për një periudhe 9 javore, 80% të pagesës mujore të punonjësit dhe punëdhënësi të paguajë 20% të saj.
- Të miratohen rregulla dhe procedura të posaçme për rregullimin e marrëdhënieve të punes dhe mundësia për kalimin në asistencë të përkohshme të punonjësve në rastet e gjendjes së jashtezakonshme, kur sipërmarrjet kanë pamundësi të pagesës së pagave dhe kontributeve mujore.
- Të pezullohet detyrimi i parapagimit të TVSH-së në doganë për importin e mallrave.
- Të anullohen këstet e parapagimit të tatimfitimit për vitin 2020, për sipërmarrjet prodhuese.
- Të bëhet menjëherë rimbursimi i TVSH-së së prapambetur për të gjithë sipërmarrjet prodhuese.
- Të bëhet shtyrja automatike e pagesave të kredive apo overdrafteve, për një periudhë jo me pak se 3 mujore, në të gjithë sistemin financiar të huadhënies, si dhe të mundësohet aksesi në grante apo hua me interes jo me të lartë se 0.5 % (përfshirë kostot administrative), me procedura të përshpejtuara dhe pa ju referuar pozicionit të mëparshëm, si kredimarrës në sistemin bankar, për sipërmarrjet prodhuese.
- Të shtyhen për një periudhë 90 ditore, duke filluar nga data e shpalljes së karantinës, të gjitha skadencat e procedurave administrative dhe ligjore, të cilat nuk mund të përmbushen për shkak të situatës së krijuar nga epidemia Covid-19.
- Të shtyhen deri në fund të vitit 2020, të gjitha pagesat për taksat dhe tarifat lokale të sipërmarrjes prodhuese ndaj pushtetit vendor.
- Të reduktohet në masën 50% çmimi i energjisë elektrike, për një periudhë 90 ditore duke filluar nga data e shpalljes se karantinës, për sipërmarrjet prodhuese (duke reflektuar rënien e çmimeve të pasqyruara në bursën e energjisë në Budapest).
