Rreth 20 mijë shqiptarë të Kosovës, dynden drejt Shqipërisë për fundjavë

261
Sigal

Rreth 20 mijë qytetarë të Kosovës, kanë kaluar kufirin Kosovë-Shqipëri gjatë të premtes dhe të shtunës. Sipas mediave të Kosovës, një nga arsye janë edhe masat anti-Covid që i ka miratuar Qeveria e Kosovës.

Por, a duhet të izolohen qytetarët e Kosovës, pasi të kthehen nga Shqipëria?

Qeveria e Kosovës më 5 prill ka vendosur masat e reja anti-Covid, ndërkohë sipas vendimit të qeverisë qytetarët që hyjnë në Kosovë nga vendet me risk të lartë të virusit, duhet të kenë testin RT-PCR negativ.

Mediat thonë se ky vendim vlen vetëm për shtetet të cilat ju kërkojnë qytetarëve të Kosovës test RT-PCR negativ për COVID-19.

“Qytetarët e huaj që hyjnë në Kosovë, përfshirë edhe ata me leje qëndrim të përkohshëm ose të përhershëm në Kosovë, që vijnë nga vendet me risk të lartë sipas listës zyrtare të ECDC-së, duhet të kenë test RT-PCR negativ për COVID-19 të bërë në 72 orët e fundit, në bazë të parimit të reciprocitetit”, thuhet në vendimin e Qeverisë.

Qytetarët të cilët vijnë në Kosovë nga vendet me risk të lartë duhet ta paraqesin vërtetimin për test negativ, në të kundërtën duhet të vetizolohen për 7 ditë.

“Të gjithë qytetarët e Kosovës, gjatë hyrjes në Kosovë duhet të paraqesin vërtetim për test RT-PCR negativ të bërë më së largu 72 orë para hyrjes në Kosovë, në të kundërtën duhet të vetizolohen për 7 ditë”, thuhet në vendim.

Por, përjashtim nga kjo pikë bëjnë qytetarët e Kosovës që kanë dalë jashtë Kosovës në 24 orët e fundit.

Bazuar në vendimin e Qeverisë, qytetarët të cilët kanë ardhur në vendin tonë, nuk do të kenë nevojë për test e as për vetizolim kur të kthehen në Kosovë.