Propozimi në Gjermani: Pa Shengen, pa BE, zgjerim të kontrolleve

726
Horst Seehofer, ministri i ri i Punëve të Brendshme, me idetë e tij ka nxitur debate. Ai kërkon kontrolle të vazhdueshme kufitare për sa kohë kufijtë e jashtëm të BE janë të pasigurt
Ministri i ri i Brendshëm dhe i Atdheut, Horst Seehofer (CSU), ka gati një javë që sapo ka marrë detyrën, por brenda kësaj jave ai do të marrë mbi vete debatin publik në Gjermani. Dhe me sa duket ia ka dalë. Pas një interviste që ndezi debatin për islamin në Gjermani, ai shton tani edhe një ide tjetër në një intervistë tjetër. “Kontrollet e brendshme kufitare duhet të vazhdojnë për aq kohë, sa BE nuk arrin të mbrojë e kontrollojë me efektivitet kufijtë e jashtëm të saj”, tha ministri. Sipas Seehofer, “nuk shoh për një kohë të caktuar, që ajo do t’ia dalë kësaj”. Me sulmin kundër lirisë së udhëtimit në Evropë, Seehofer tregon se ka nuhatje të mirë për momentin. Debati për refugjatët i filluar që në vitin 2015, sulmet terroriste të Parisit, Brukselit, Berlinit kanë dhënë efektin e tyre -pra që sot kemi vetëm një “hapësirë Shengen të formës së lehtë”. Duke iu referuar terrorit, Suedia, Danimarka, Austria e Gjermania justifikuan rivendosjen e kontrolleve kufitare. Komisioni i BE e miratoi, por me shtojcën që ato të mos marrin karakter të përhershëm. Nga viti 1995 marrëveshja e Shengenit garanton lirinë e lëvizjes mes 26 vendeve, mes tyre 22 vende të BE dhe jo anëtarëve si Norvegjia, Zvicra, Islanda, Lichtenshtejni. Heqja e kufijve të brendshëm duhej të zëvendësohej nga kontrolli i rreptë i kufijve të jashtëm. Komisioneri i BE për punët e brendshme, Dimitri Avrampopulos nuk u lodh së përsërituri se “nëse vdes Shengen, vdes Evropa”. Bullgaria që mban presidencën e radhës kërkon që nga maji të reduktohen kontrollet e përkohshme kufitare. Ministrja e Jashtme bullgare, Ekaterina Zaharieva u shpreh se kufijtë e zonës Shengen duhet të jenë të hapur, që ekonomia të mos dëmtohet. Për Seehofer kjo nuk ka shumë rëndësi. Ai madje foli për median gjermane për zgjerim të ndjeshëm të kontrolleve kufitare. Nëse Seehofer del e kërkon i vetëm zgjerimin e kontrolleve kufitare Komisioni Evropian mund të reagojë duke e parë veprimin gjerman si shkelje të marrëveshjes. Një ri-rregullim i marrëveshjes kërkon miratimin e të gjithave vendeve anëtare. Por Seehofer rrezikon grindje jo vetëm me BE, por edhe brenda koalicionit me CDU e SPD. Marrëveshja e koalicionit e nënshkruar edhe nga Seehofer përmban edhe fjalinë: “Ne jemi të një mendjeje lidhur me refuzimin ndaj proteksionizmit, izolacionizmit dhe nacionalizmit. Kemi nevojë për më shumë e jo më pak bashkëpunim në botë”. Shumë vetë në rrjetet sociale shprehen se Horst Seehofer me debatin për kontrollet kufitare ndjek qëllime të tjera. Duke pasur parasysh zgjedhjet e landit në Bavari, ai mund të dëshirojë të nxjerrë në pararojë CSU-n si forca nxitëse e sigurisë dhe ruajtjes së kufijve. Nga kampi i majtë ai duhet të dëgjojë kritika, sepse ai synon të rifitojë votuesit konservatorë që kanë shkuar tek partia populiste e djathtë, AfD.
Sigal