Presidenti i republikës, Ilir Meta ka adresuar një mesazh nga Varrezat e Dëshmorëve, ku ka bërë edhe homazhe në memorialin “Nënë Shqipëri”.
Presidenti apelon për vigjilencë më të madhe në luajtjen e lirisë dhe pavarësisë sepse sipas tij në kohë të reja gjenden mënyra të reja për të cenuar pavarësinë e një shteti.
“I përshëndes sepse nuk patëm mundësi t’i takonim familjarët për shkak të COVID-19.
Të mos bëhemi mendjelehtë dhe të marrim lirinë dhe pavarësinë si të lehtë. Nëse nuk jemi të vëmendshëm dhe vigjilentë ato janë gjithmonë të cenueshme, ndaj sot dua të apeloj për ti kushtuar vëmendje më të madhe edukimit të të rinjve me luftën antifashiste nacional çlirimtare, dhe të vërtetat dhe sakrificat e saj.
Do ishte mirë ti kushtonim më shumë vëmendje në procesin e edukimit dhe mësimdhënies. Liria dhe pavarësia duhet të mbrohen çdo ditë sepse në kohë të reja cenohen në mënyra të reja.
Sot është dita e dëshmorëve, e nderimit tonë për ata që kanë dhënë jetën dhe gjithçka të shenjtë për vendin tonë. Është një ditë për të shprehur përulësi ndaj veprës së tyre, por edhe për të përshëndetur, familjarët, pasardhësit e tyre që sakrifikuan gjatë asaj lufte. Është një ditë për tu angazhuar që Shqipëria e lirë të realizohet plotësisht”, tha Meta.
