Prokuroria e Përgjithshme ka dhënë sot pretencën për dy deputetët socialistë, Arben Ndoka dhe Pjerin Ndreu të akuzuar për dhunën ndaj deputetit të PD-së, Gent Strazimiri. Organi i akuzës kërkon 1 vit burg për Arben Ndokën dhe 8 muaj burg për Pjerin Ndreu. Sipas Prokurorisë dënimi për Ndokën mund të konvertohet në 150 orë punë publike, ndërsa për Ndreun në 100 orë punë publike.
“Prokuroria e Përgjithshme kërkon shpalljen fajtor të shtetasve Arben Ndoka dhe Pjerin Ndreu, me funksion deputet, dhe dënimin e tyre përkatësisht me 1 vit burgim (Ndoka) dhe 8 muaj burgim (Ndreu), të akuzuar për konsumimin e elementëve të veprës penale parashikuar nga neni 237 i Kodit Penal, “Goditje për shkak të detyrës” në dëm të shtetasit Gent Strazimiri, me funksion deputet, ngjarje e ndodhur në datë 10.07.2014 në ambientet e brendshme të Kuvendit të Shqipërisë”, thuhet në deklaratën e Prokurorisë së Përgjithshme.
Në konkluzionet e saj prezantuar sot para Gjykatës së Lartë, Prokuroria e Përgjithshme kërkoi që, nëse të akuzuarit japin pëlqimin e tyre, të pezullohet dënimi me burgim dhe zëvendësimin e tij me detyrimin për të përmbushur një punë në interes publik, me pëlqimin e tij dhe pa shpërblim, në favor të interesit publik, në një masë të përgjithshme prej 150 orë pune për shtetasin Arben Ndoka dhe 80 orë pune për shtetasin Pjerin Ndreu.